坐輪椅現身！聲音沙啞嘅華仔首開腔承諾：「我會好快就跑跑跳跳，談談笑笑又出現㗎喇！」

早前劉德華於泰國拍廣告時墮馬受傷，其後仲需要全面停工，好好休養！而有份參演電影《拆彈專家》同擔任主角嘅華仔雖然係首映當日未能出席，但出名錫粉絲嘅佢都有為一眾影迷以錄影現身，並坐住輪椅交代最新狀況，令一眾影迷都相當感動呀！

華仔係錄影度聲音聽落去有啲沙啞，但著上一套黑色西裝嘅佢，依然都係相當帥氣！

華仔先用戲中角色介紹自己：「大家好，我係爆炸品處理課嘅高級督察章在山，我今日有突發事在身，嚟唔到現場，但係我哋有一班手足，係到同大家解除危機！」

之後就感慨咁表示：「宣傳唔係你想宣傳就得，要上天批准㗎，所以今次個天就要我休息一輪，希望我可以精精神神再見到大家！」

見到一班手足咁落力跑宣傳，華仔非常貼心咁逐一點名去致謝每一位演員、導演同台前幕後嘅工作人員等人，「係我哩套戲入面有句說話就係用『生命保護生命』，佢哋係未來日子會代替我用『生命保護生命』，去到世界各地去宣傳《拆彈專家》！」

最後華仔向導演承諾：「我會好快就跑跑跳跳，談談笑笑又出現㗎喇！」粉絲們聽到都好感動，相信哩個亦係對粉絲們嘅一個諾言！（華仔，一眾粉絲都等緊你呀！）不如大家一齊集氣祝福華仔早日康復啦！

Source: Youtube