大刮回巢風！盤點10位TVB資深藝人回巢救收視，你最睇好同最期待邊個嘅演出呢？

近年好多TVB小生花旦約滿而離開TVB，TVB嘅親生仔女如林峯、黃宗澤、鄭嘉穎、佘詩曼等人都相繼離巢，上內地發展搵更多真銀！冇咗一班收視冠軍坐陣，TVB就即刻諗到解救方法，就係搵嚟更早期嘅小生花旦回巢救收視，以下哩10位TVB資深藝人，你最睇好同最期待邊位嘅演出呢？

1. 張衛健

早前呼聲最高，個個人都期待佢返嚟嘅一定就係張衛健，張衛健之前係《我愛香港》嘅節目中仲霸氣咁公開表示：「人仔跌唔跌，都有可能返TVB」，不但令全場拍爛手掌，相信一眾電視迷聽到哩句後心入面都好興奮！

「型到跌渣」、「噼啪你個隆的咚呀」大家最記得一定係張衛健飾演孫悟空時嘅超經典台詞，今次強勢回歸返嚟拍台慶劇《大帥哥》，唔知今次大台劇集有冇為佢準備到咩經典台詞同角色，為佢再創下另一個高峰呢？

2. 羅嘉良

貴為三屆視帝、TVB「一哥」嘅撈家羅嘉良，自2009年《富貴門》後，已闊別咗TVB有8年，今次返嚟拍《與諜同謀》，雖然撈家係絕對有收視保證，但今次嘅《與諜同謀》明顯角色未能令佢完全發揮演技，所以收視亦未見有好轉！

其實以前撈家真係創下唔少經典角色，相信好多80、90後宦都一定記得《難兄難弟》、《天地豪情》、《先生貴性》、《創世紀》、《流金歲月》等等，每套都令人印象深刻，以前好多人晚晚捕定電視都係為睇佢演出嘅劇集，絕對係收視王！

3. 林文龍
近日，有睇TVB嘅可能都會見到林文龍嘅身影，因為TVB將播放嘅新劇《不懂撒嬌的女人》會有林文龍擔正男主角！對林文龍嘅認識，好多人或者都停留咗係經典處境喜劇《旨大歡喜》嘅駙馬爺金年，但其實作為資深藝人嘅佢，當然有創下唔少經典劇，先令TVB極力搵佢回巢！

其中《洗冤錄》、《本草藥王》、《法證先鋒》等等都係有唔錯嘅收視，而佢每部劇都係擔正第一、二男主角㗎，絕對係甚有觀眾緣嘅男演員！

4. 馬浚偉

馬浚偉嘅樣子比較忠直，所以每次TVB都比佢飾演一啲白臉小生或正義之士等角色！雖然一直受到TVB重用，擔正唔少劇集嘅第一男主角，如《洛神》、《帝女花》、《鐵血保鏢》、《碧血鹽梟》等等，但總係同獎項冇緣，未能得到大家肯定！

今次強勢回歸嘅佢，就已經拍攝TVB嘅重頭劇《深宮計》，唔知今次係劇集中會唔會令佢有更突出嘅表現呢？

5. 方中信
好多女仔都非常鐘意方中信，除咗夠型夠CHARM，仲因爲佢散發著一種大叔魅力，完全就係師奶殺手！不過方中信係2013年完成咗《仁心解碼II》一劇後，就正式同TVB約滿，與無綫電視再冇合約關係！

方中信都有拍過好多劇集，如《仁心解碼》、《建築有情天》、《烈火雄心II》、《爭分奪秒》，雖然未必每套劇收視都大好，但總會有一眾大叔控係為睇佢而坐定定睇電視！而係上年佢亦有回巢拍《律政強人》，相信好多人都係為睇方中信而追劇！

6. 苗僑偉

同樣都係師奶同少女殺手嘅三哥苗僑偉非常得到觀眾緣，雖然而家已經58歲嘅佢但依然魅力不減，反而年紀愈大愈有型！三哥每次出演嘅劇集都係擔正做非常有型嘅角色，如《學警出更》、《歲月風雲》、《刑警》等等，每一套劇集入面嘅三哥真係絕對可以迷死人！

而三哥今次返嚟就係拍另一TVB重頭劇《使徒行者2》，因為第一輯嘅男主角林峯同女主角佘詩曼都已經先後離巢，好多人都覺得劇集冇咗原班人馬好可惜，不過有三哥坐陣，絕對係收視保證呀！

7. 陳慧珊
當年為「千禧年代無綫五大當家花旦之一」，而佢演出嘅的角色好多時都係專業人士為主，如《鑑證實錄》系列、《妙手仁心》系列、《創世紀》系列、《衝上雲霄》、《翡翠戀曲》、《隔世追兇》等等～

而今次就伙拍黃智賢合作拍攝《波士早晨》，唔知今次係咪都係做專業人士呢？不過有陳慧珊出演，相信會令一眾80、90後都想睇返TVB！

8. 陳松伶
陳松伶又名松松姐姐，已經有6年冇係大台出現過嘅佢，今次返嚟拍攝《全職沒女》，做一個愛情事業都失敗嘅沒女，唔再係以前嘅妹妹仔角色，雖然搵返松松姐姐再次出山救藥，但收視依然未如理想呀！

以前為TVB花旦，因為樣子甜美，都擔任過唔少劇集嘅重要角色，如《金裝四大才子》、《金玉滿堂》、《飛短留長父子兵》等，當年清純外貌加上圓滾滾嘅大眼睛都真係殺死唔少少男粉絲！

9. 宣萱
以前有睇開TVB，應該都會經常見到宣萱嘅影子，佢係當時「千禧年代無綫五大當家花旦之一」！每年都總有幾套係佢擔正女主角，如《戇夫成龍》、《老婆大人》、《尋秦記》、《賭場風雲》等，每套所演嘅角色都令人留下深刻印象，有好多劇集到而家都仲會翻睇幾次㗎！

今年宣萱又再戰電視圈，已先後拍攝《不懂撒嬌的女人》同《使徒行者2》，相信好多人都會好期待佢嘅表現呀！

10. 蔡少芬
當年成為咗最年輕視后嘅蔡少芬，同為「千禧年代無綫五大當家花旦之一」，曾拍過《妙手仁心》、《天地豪情》、《創世紀》、《陀槍師姐III、《洛神》等，每套都係當時嘅經典之作呀！

自金枝慾孽貳後，闊別TVB多年嘅蔡少芬，為咗好友王祖藍都決定返TVB接拍《老表，畢業啦！》，而且仲會同郭晉安等人合作，兩位實力派演員又有唔少令人期待嘅對手戲，相信好多人都想快啲睇到佢地嘅演出～

Source: Google/Instagram