100分女友突變貪錢女人！洪永城開聲維護喊爆詩詠：希望大家不要再傷害她！

自從洪永城同唐詩詠一齊宣佈和平分手之後，網民都對佢地分手嘅原因有唔同嘅睇法。亦有報道指唐詩詠係因為搭上太陽世紀集團執行董事盧啟邦先至同洪仔分手，搞到原本嘅100分女友突然變咗貪錢女人......舊愛洪仔噚晚終於忍唔住為舊愛出聲！

雖然雙方都講到明分手唔關第三者、唔關逼婚事，不過被唔少傳媒仍然窮追猛打....先有唐詩詠同盧啟邦嘅合照，再有詩詠力數洪仔七宗罪。其實感情係兩個人嘅事，中間發生過嘅野得詩詠同洪仔先知，大家與其估估下，不如畀啲空間佢地啦～

洪仔噚晚開記招嘅時候，話以佢所知嘅詩詠仍然係單身，亦話分手其實已經有一段時間，原因係因為雙方意見、性格上面有分歧，覺得既然做情侶唔work，所以就以朋友方式繼續呢一段關係～

而噚晚詩詠拍劇嘅時候亦首度開腔回應。佢話嗰張所謂合照只係係一個聚會上對方要求，嗰陣時亦唔識對方，唔知點解最終會有咁嘅緋聞傳出。講到被指自己畀人包，係個貪錢嘅女人嗰時，詩詠終於忍唔住喊咗出嚟，亦話對佢嚟講：「愛情從來都只係愛情，以前係，而加係，將來都係。」

詩詠委屈喊爆之後，洪仔當晚亦都即時係FACEBOOK維護舊愛，唔少網民亦都大讚洪仔有膊頭有擔帶！

詩詠係咪100分女友小編都唔清楚，不過真心講句如果詩詠真係貪錢女人嘅話，當初就唔會守候崔建邦咁耐，亦都唔會睇上冇腳嘅雀仔浪子洪永城搞到36歲都未有著落，一早就搵個富豪結婚生仔收山啦！

雖然分手之後，洪永城同唐詩詠粉絲都各有唔同嘅意見，有啲鬧洪仔花心唔肯結婚，有啲話洪仔都係同翠如襯啲......感情嘅野，從來都冇對與錯，更何況人地都話大家仍然係好朋友咯，希望傳媒未確認事實真相就唔好再繼續分化同中傷喇～

不過無論點都好，大家都一定會記得「有一種女朋友，叫唐詩詠。」嘅美好時光！

source: instagram、weibo、tvb.com