【“鮨”此“一”間 ——《鮨一》】

早排聽到有人話尖沙咀有間新開嘅日本菜，個幾層高嘅海膽飯好好食，為食嘅我就緊係即刻約朋友去開餐啦。

上到去舖位唔大，一眼望晒，但勝在座位夠齊全，皆因你可以選擇壽司bar位，普通坐位，仲有2間分別4人同8人嘅房，食生日飯都幾唔錯。

由於我同友人book咗18:30，所以上到去可以揀坐位，我就揀咗坐壽司bar，皆因可以望住師傅點樣整壽司（我並不是變態的?），重點係我太鍾意發問喇！

頭盤：
鮨一沙律
其實平時我唔鍾意食沙律，因為啲菜好苦，今次朋友話想食，咁就試下啦。用長野縣高糖度蕃茄加切角魚生，呢個沙律完全冇我以前食開果啲嘅苦澀味，重點要提嘅係個tomato，清甜爽口，師傅話係日本空運嘅新鮮蕃茄。

Photo from edf

小食：
燒銀雪魚干
貪佢又薄又脆，其實送sake真係一流㗎，可惜皮膚敏感唔飲得酒住，唯有以茶代酒。

Photo from edf

剌身：師傅推介咗2款比我地
真名堅薄切
都係飛機貨！呢種魚生係我第一次食，一食已經愛上！平時我只係叫下三文魚、油甘魚、呑拿魚… 食嘅都一定會加鼓油同wasabi，當我對筷子夾住片真名堅嘅再預備放落個醬油碟嘅時候… 師傅即刻叫停我！佢話完全唔需要點醬油，我用好疑惑嘅眼神望住佢，佢用好堅定嘅眼神確定我。食咗片… 嘩！痴線㗎，真係乜醬油都唔需要！刺身上面加咗啲新鮮紫菜同海膽醬，唔會有魚腥味。朋友仔唔食魚，但見我食得咁滋味都忍唔住食咗片，之後成碟都係我嘅?

Photo from oznor

搞笑嘅係，我問師傅呢碟係咩名堂？師傅話真名堅薄切，我反問師傅乜有假名㗎咩？師傅話，種魚叫真名堅，做法叫薄切。sorry… 我笑咗?我feel到連師傅都偷笑，我太孤陋寡聞喇，哈哈！
南非龍蝦拼12頭鮮帶子
又係飛機貨呀！龍蝦要早2日預訂㗎！龍蝦肉新鮮到呢… 爽爽爽！其實刺身新唔新鮮真係好易就知，因為真係食得出㗎！新鮮嘅刺身一定係爽口同鮮甜嘅。至於鮮帶子，以前食過18頭嘅，今次就試12頭。

主菜：
千層海膽飯
呢個真係不得了！爸呀… 我唔知佢有幾多層呀！好高高呀！由於2條友都已經好飽飽，但我又真係好鍾意食海膽，所以叫咗個mini版，睇住師傅大大片海膽放上飯面，都咪話唔興奮，層層疊嘅海膽飯下面仲有拖羅，焦點所在係啲海膽仲多過啲飯，大大粒，真係絕不欺場。

偶然發現，原來鮨一嘅壽司飯係用日本秋田小町米加赤醋做㗎。

I'm sure : I will be back !!!

Page : facebook.com/phoebeliu1012

師傅嘅專注，睇得出佢嘅用心。
千層海膽飯，每台必叫之選！

全場爆滿！唔想等位真係最好提早book位！