【放榜？唔洗怕】

莘莘學子 DSE 放榜，有笑有淚！

Car 姐想當年考果個叫「會考」，都好一段日子前既事。

想當年， Car 姐得分16，全部集中喺中文同文學。

呢啲咁既分數最激死人，高不成低不就。

原校第一輪唔收我讀中六，話我成績差；但個分重讀又真心唔甘心。

就係咁，我含著一泡眼淚，同幾個同學展開東奔西走之旅。

讀開間中學薄有名氣，你會明點解唔想讀唔同 rank 既學校。為求有一間我啱佢佢啱我既學校可以讀中六，跑足幾日。

果幾日既失落，無助，傷心，迷惘，經歷過既，你會懂的！

兜兜轉轉，知道有位同學要去外國升學放棄個中六學位，我「立」齊曾經為學校爭光既証據就番去「求」校長比次機會。

校長可能被我求足三日三夜既真誠感動，終於收我原校升讀。

謝天謝地，一天都光哂！

其實中學既日子， Car 姐啲成績都唔係特別標青。

但我相信每一個人都有才能。好似我咁，中學時作文和運動都比較好。只要你善用才能，把握機會，唔放棄，你一定可以得到你想要的。

年青人們，加油呀！