易先生護主慘死！55歲歐瑞偉型爆演出被封「港版007」，網民力捧佢拎最佳男配角〜

係劇集《同盟》飾演易先生嘅歐瑞偉，除左係令小姐嘅左右手，而且十分效忠令小姐，為佢上刀山落油鍋都在所不惜，而且身手不凡，槍法又準，被網民封為「港版007」之餘，更獲得唔少師奶少女嘅喜愛添！

自幾年前處境劇《愛‧回家》飾演野心律師廖啟聰(KC)之後，已經令好多人開始重新認識歐瑞偉，加上上年為左劇集《城寨英雄》楊竹鑾一角激減15磅，為左爆衫仲不斷操fit自己，又戒晒油鹽糖，而且飾演終極大反派當中，深藏不露嘅演技再次備受注目，深入民心，成功打到入晒屋！

今次劇集《同盟》飾演易先生嘅歐瑞偉再下一城，連場打鬥場面，魅力沒法擋！歐瑞偉係劇中一再展身手，被網民封「港版007」，人氣急升，甚至力捧佢攞今年最佳男配角獎，《同盟》監製文偉鴻亦點名讚歐瑞偉。

拎起槍真係型到爆呀！結局仲為左保護令小姐慘死，個份護主嘅忠心真係令人睇到心噏又感動，易先生依個角色真令人難忘！‘

歐瑞偉開心獲讚，不過佢相當謙虛，係個人社交網站多謝網民之餘，亦不忘讚陳展鵬好打得，係好好嘅對手。佢更歸功於當年一班師兄弟、好打得嘅武師、動作指導，同佢哋一齊，有好多得著，好多謝佢哋。多位TVB藝人亦都係社交網站分享佢嘅報道同讚賞佢。

現年55歲嘅歐瑞偉其實一直都好用心演好每一個角色，就好似劇集《尋秦記》為人熟悉嘅「陶方」、《回到三國》搞笑又嚴肅嘅「關羽」等等〜

仲有《愛‧回家之開心速遞》嘅KC，每次同Terry嘅戲份都好好笑，同Helen嘅感情線都好好睇，而且訓身演出，反串著女裝、扮楊過等落力嘅表現相信觀眾都有目共睹！

佢唔只戲裹重情重義，佢係戲外對老婆同兩個女都一樣咁有情有義。97年亞洲金融風暴影響甚深，以致吉隆坡樓價大跌，歐瑞偉為左佢屋企人，2000年係大馬回流TVB，曾經係電視劇做男一男二居多，但再返到無綫做嘅多數係閒角配角，收入大不如前。

佢甚至有時係公司冇嘢做，幫手拉「威也」，幫補下家計。但佢唔怕辛苦，仲大讚佢老婆要照顧兩個小朋友，仲辛苦。為左家人去到咁盡，真係愛家深切呀！

Text：Holiday Editorial

Photo Source: TVB, 歐瑞偉Facebook