高海寧《森美旅行團》做食評家被激讚！堅識食唔係hea講，言之有物＋真性情表現獲力讚〜

唔知大家有冇睇TVB節目《森美旅行團》呢？由森美帶大家去東京搵真 · 隱世小店，吃喝玩買通通有齊，因此播出後反應都唔錯！而且森美同三個靚女主持高海寧、黃心穎、麥美恩嘅互動搞笑又好睇，而表現令人眼前一亮嘅，一定係高海寧（高Ling）莫屬！

講起高Ling，大家可能都會諗起性感女神、好身材、《不懂撒嬌的女人》中嘅田蜜等等，但除左樣靚身材正，高Ling仲非常識食！係《森美旅行團》中介紹食店化身專業食評家，食後感言之有物絕對唔係hea講！

睇飲食節目最煩就係主持人言之無物，不停重覆「好好味」、「好有口感」等講左等如冇講嘅感想，真係會嬲到想熄機，觀眾就算食唔到，都想聽下你仔細形容食物嘅味道同質感，而高海寧就做到啦！

《森美旅行團》中走訪唔少食店，好似海鮮漢堡包店、抹茶料理、米芝蓮甜品、高級壽司店、蟹宴、溫泉料理等等，每次見到高Ling大啖大啖食，然後露出幸福表情完全冇女神架子，都會覺得個樣美食真係好吸引、堅好食，而且睇得出高Ling真係識食同愛食之人〜

而且佢嘅食評絕對唔係頹貨，而且味覺仲「好靈」可以仔細食出用左咩食材，例如食海鮮漢堡時：「昆布混入豆腐中汁裡面」、「將蟹膏混入蟹肉搗爛然後拎去炸，所以咬落去好似爆漿咁」睇到佢食得咁滋味，加埋豐富又生動嘅形容同描述，真係睇見都覺得餓，好想即刻飛去日本食好西呀！

食漢堡包都唔顧女神形象大啖咬，好過個D扮雀仔胃咬一細啖就當試左嘅女星啦！唔作造嘅真實表現，從來都係觀眾最鍾意睇嘅！

仲有食吞拿魚壽司時，食出醬酒加左柚子、識食一定食中拖羅因為保留左魚味和油香味等等〜可見高Ling絕對係識食之人！

其他仲有食可樂餅時滿足幸福嘅表情同食評〜真係睇見都想食呀！！！

而且佢地去玩VR，畏高嘅高Ling嚇到喊，但都堅持玩埋個Game，觀眾睇到好笑之餘都好佩服佢嘅真性情演出，感覺更親近更親切！

高Ling真係可以考慮做多D旅遊、飲食節目呀〜觀眾一定鍾意睇！

Text：Girls editorial

Photo Source：TVB，Instagram