48歲唐文龍《溏心3》演賤男！重返TVB演型爆教授，本身有博士學位講英文勁好聽〜

TVB台慶劇《溏心風暴3》差唔多播左兩星期，集合多位當紅小生花旦加老戲骨，陣容鼎盛又係經典《溏心風暴》系列，絕對值得睇下嘅〜而劇中另一亮點，絕對係久違11年重返TVB拍劇嘅型男唐文龍！

唐文龍依位大隻型男相信大家都唔陌生，經典角色有《十月初五的月光》嘅金勝、《妙手仁心》嘅Edmond、《人生馬戲團》嘅阿星等等，雖然多數演出男配角，但一身爆肌健碩身材加上剛陽極Man五官，都算係TVB男神之一，粉絲都唔少加〜

拍完《人生馬戲團》後，唐文龍就離開TVB北上發展，試過捱窮要九個月淨係食麵包、麥皮，供樓都要靠家人接濟，但始終都冇放棄演藝事業，直到最近回歸拍攝《溏心風暴3》，就挑戰渣男角色，讓人眼前一亮！

劇中飾演的大學講師鄭立安（Nic），外表斯文靚仔、官仔骨骨，其實係個為報仇不擇手段嘅奸角，仲同陳敏之飾演的黃以愛有段不倫之戀！

尋日個集就講到，以愛發現自己誤會咗Nic係衰人，就主動去示好，而Nic仲好細心咁話會教佢唔識嘅課題，已經令以愛對佢好感度大增！認真工作嘅男人係最有型，如果有咁型嘅教授真係唔知可唔可以專心上堂（笑）

後來上完堂後，以愛發現自己唔見左有公司機密資料的USB，Nic就好熱心幫佢四圍搵，仲摷垃圾搞到件衫污糟曬，咁Man即刻大大加分啦〜

不過聽到佢同老婆講電話，就知Nic已經結婚仲有個囡，以愛個樣即刻好Down...

後來Nic送佢番屋企，以愛仲餵佢食咖哩魚旦，一人一啖好Sweet，就知以愛開始冧佢，暗生情素啦〜

睇到依度，以為唐文龍係個好男人就大錯特錯，其實佢接近陳敏之都係想破壞黃家！因為佢媽媽係夏雨舊情人，所以一心想報復，就背住老婆女兒勾引陳敏之做佢小三，後來再做埋昌旺集團CEO，使盡奸險手段又玩弄感情，真係世紀賤男一名！

而佢同陳敏之更會有多場激情戲份，後來兩人嘅不倫戀被李司棋發現，陳敏之更為唐文龍跳海自殺而昏迷，最後唐文龍都身敗名裂，今次演渣男對唐文龍黎講都算突破，可望為觀眾留下深刻印象！

其實唐文龍真係一個高質型男，劇中飾演教授有幾場英文講課情節，一口流利又動聽英語，演教授真係入形入格，而本身亦於紐約Fashion Institute of Technology 攻讀服裝設計博士學位！

48歲唐文龍更具成熟男性魅力，不時做Gym操肌，身形Fit爆Keep得好好，有樣有身材有學歷仲有演技，相信觀眾都好期待佢拍多好劇畀我地睇！

Text：Girls editorial

Photo Source：TVB，Instagram