成班演員變哂做喪屍！《降魔的》全員拍「攪咩鬼習作」搏開續集，「十字路口有落呀唔該」成焦點！

《萬千星輝頒獎典禮》仲有幾日就舉行，近日一班藝人們都四出拉票～勁Hit嘅劇集《降魔的》都唔例外，噚晚就約咗成班藝員出嚟食飯聚一聚，為咗多謝觀眾支持仲拍咗一條片添！

係呢段短片入面，背景音樂用咗主題曲《到此一遊》，一班劇中演員就模仿揸車嘅Pose開始呢段《降魔的之攪咩鬼習作》！小馬、芷若、龍貓、石敢當、莉莉、展明、晶晶、有為、佩玲都係齊度，唯獨少咗啤啤～

龍貓（何遠東）喺Facebook留言表示：「基於要多謝大家對《降魔的》嘅支持，我地又點可以唔做多少少嘢去報答大家呢？嗱，真係少少少少！又基於一篇千字文岀現，我地又點可以唔準備少少片花，去吸住大家個睛呢？嗱，條片真係會吸睛㗎！究竟有冇《降魔的之XXXX》，就睇大家啦！」

片中佢地做咗多個揸車動作，例如：撻車匙、扭軚、校倒後鏡等等～因為《降魔的》喺架的士度發生，所以有呢啲動作又真係幾有趣！

芷若（黃智雯）Solo跳跳下舞，成班演員一齊出場搖下搖下，好似成班喪屍咁！唔通呢個就係下集嘅Idea？

喺片尾就出現一句：「十字路口有落呀唔該」，然後就有人答：「收到」～究竟拍唔拍到續集，就要睇下《降魔的》喺嚟緊嘅頒獎禮上拎唔拎到獎啦～

《降魔的》結局留下伏線，絕對係為續集鋪路！呢個重磅消息亦得到證實，編審羅佩清喺Facebook出咗篇千字文透露有意拍續集，連劇名都已經諗好叫《降魔的之十字路口》～

「但目前仍有不明朗因素，還未正式落實，如果觀眾真係想有第二部，可能要幫《降魔的》在萬千星輝頒獎禮加加油。其實《降魔的》只是超低成本經營，不敢奢望有獎，有份陪跑已是榮幸，但願藉此機會爭取多一點民意，令公司對第二部會有信心。」如果想《降魔的》出第二集就要去支持下佢地啦！

一大班網民都好支持拍續集，不過前題係：如果可以原班人馬拍攝就會更佳啦！

Text：Girls Editorial

Photo Source：Facebook、Instagram