【別為任何原因毀了妳的美貌】

尋日係母親節，出左去同屋企人食飯

一如以往我努力打扮,親戚們就開始討論我既造型,

「如果我後生都會咁著,依家真係唔得啦~又肥又老」

佢個仔就潤佢話:「你咁著我會走先囉~」

到左食糖水，多口既親戚又拎我家姐黎講:「如果俾你，可唔可以打扮到咁?」

家姐好自然地話:「緊係唔得啦~我老啦~同埋結左婚之後我都無咩點打扮~番工又好hea咁著,未結婚前都會比較著重自己外表,但依家真係無咩理由去打扮,老公又唔係咁著重外表,我結婚之後都肥左廿幾磅了~哈哈哈~」

係我記憶中,家姐以前係一個靚女,樣貌身材都中上,追求者無數,自從結婚後就疏於打扮,依家未有小朋友已經甘願做個師奶,然而佢只係27歲而已,令我不禁感嘆……

其實好多女人原本都好靚,但會因為工作,家庭,拍左好耐拖,結左婚等既理由而疏於打扮自己

「公司要OT啊嘛……邊有時間打扮」

「對住公司D麻甩佬都無咩心情打扮」

「都結左婚/拍左咁耐拖啦！唔洗點去打扮架啦~」

我覺得做女人唔應該係咁,你可以好負責任做個好媽媽,好老婆,好員工,但唔應該以此為藉口懶去打扮自己,有好多人可能會睇唔起打扮,會覺得咁樣係自私當花瓶既行為,但請你要知道,其實打扮都係管理自己既一種,我地亦都唔應該為了誰而打扮,點解唔可以係為左自己而變得更加漂亮?

工作可以買走你打扮既時間嗎?愛情可以剝奪你打扮權利嗎? 工作會變,你身邊既人都可能會變,世界上有咁多未知數之下,唯一可以掌握既就只有自己,係為其他人負責之前,也請你做好自己,愛惜自己,學會適當地「自私」一點,能夠為你的美貌負責的人,也只有你自己！

內在美固然重要, 但做女人都應該要學會擁抱自己的外在美, 相信無人會對自己變得更美而反感吧！所以，請別為任何原因毀了妳的美貌！

Source:紗栄子twiiter