【Travel—文迪韓行 Chp.3 : Common Ground 藍色貨櫃 │首爾建大站】

首次嚟韓國旅行嘅，除左要著韓服去景福宮，另一個Must Go 嘅 Location，邊少得 Common Ground 藍色貨櫃商場？

-
大家對藍色貨櫃唔會陌生，因為有唔少YouTuber介紹過，連韓國女團SISTAR大熱歌曲Shake It嘅MV都係喺呢個地方拍攝。Common Ground既係一個影相好去處，又係一個朝聖熱點。

-
Common Ground嘅影相位有好多，人流就一陣一陣咁嚟嘅。身為一個旅遊熱點，到處都聽到好熟悉嘅廣東話，好有親切感啊！靜候一陣間就可以等到最大嘅嗰面藍色貨櫃 Background影相。

-
除咗打卡點，Common Ground亦係一個好有特色又幾好行嘅商場。整個商圈用左200多個藍色貨櫃箱拼搭而成，仲係韓國第一間POP-UP貨櫃箱主題式嘅購物中心。商圈分為Street Market（女裝）同Market Hall（休閒 & 男裝）。不過呢到價錢略貴，同樣嘅產品可能會貴10-15%，但勝在集結咗唔少精美嘅文化產物，所以韓國嘅潮人都會去呢到尋寶架！

-
我都推介返兩個尋寶熱點先。
-
第一，Alice『專區』 (愛麗絲迷必定要去望望！)
因為周圍啲精品都好靚，我其實都唔太記得係喺Street Market定Market Hall見到。

-
嗰到一行入去就會見到Alice立牌，隔離擺放曬Alice相關精品：杯碟、暖水壺、Phone Case等等；同場亦有Disney公主系列精品。每一樣野都好靚好少女，仲好高質。不過價錢就真係有啲貴，一隻碟都賣緊三百蚊港紙，所以今次用眼睛同相機收藏咗就算了。

-
另一個，係Kpop『專區』。

第一眼就望到Twice嘅海報！呢到集結咗唔同韓團嘅專輯同官方應援燈，連好稀有嘅官方刊物同卡通應援Figure都可以喺到見到。對於Kpop迷嚟講，都係個幾岩睇嘅Check Point，唔買都望下嘛！
-
-
藍色，既文青又活潑。
大家有機會去韓國，都記得去Common Ground打個卡，影張靚相啊！
-

-
Common Ground 藍色貨櫃
交通：地鐵2號線建大入口站6號出口，向前步行約5分鐘