名古屋十大必吃gogogo! 吃掉整個高山北陸地區laaa～

冬天緊係要番我家鄉睇雪xd今次仲要揀咗係我一直夢寐以求想去嘅名古屋,睇靚景之餘都不忘我是一名專業既吃貨，出發前我有做足功課搜羅各大美食專欄，務求唔要係呢個浪漫小鎮上留下任何遺憾...

廢話唔多講，以下所講嘅十家店舖或者小食經過我精心挑選印象最深刻，有好有唔好排名不分先後

1)在寒冷天氣底下送上一點溫度的飛驒牛肉包

飛驒高山的街道上到處可見飛驒牛肉包。原味飛驒牛肉包，430yan。除左牛肉外還加入大量洋蔥，味道偏鹹但依然美味，其實食佢最主要原因系因為我嗰陣真係好凍見佢熱辣辣標晒煙咁所以特別想食，不過佢其實都幾飽肚所以如果你正要去食正餐就唔建議試

地址:飛驒高山

2)飛驒牛壽司 有晒證書嘅飛驒 こって牛包冇假

我諗飛驒牛壽司係無10都有9個blog會話要食既野，因為喺名古屋真係周街都會見到‘飛驒牛’呢三隻字，而係呢條街都有好幾家賣飛驒牛壽司，不過就唔係間間都好食，可能因為呢間‘飛驒 こって牛’係最出名，係最出名，所以佢條隊keep住有人排，咁自然佢啲野都會新鮮啲啦，而且佢係有晒證書標榜用真正嘅飛驒牛

細緻柔美的生牛肉入口即溶，濃濃的牛肉甜香滿溢口腔，令人陶醉。尤其係有粒鵪鶉蛋黃係上面嗰舊兩者嘅味道混合埋一齊更加帶出到牛肉嘅鮮味，另外發現裝握壽司的底盤是蝦餅，真係太有創意！咁樣食物「容器」唔會變成垃圾或需要清理既餐具，反而可當個零食。值得排嘅！

店名：飛驒 こって牛

地址:岐阜県高山市上三之町34 （高山城下町、高山古街）

3)並非鍋鍋咁簡單的飛驒牛味噌陶板燒定食

我男人成日同我講話佢好想食鍋鍋…..

所以我就搵左呢間貌似食飛驒牛鍋鍋既店比佢(其實呢間店舖真正係專食河豚)

由於我哋唔識睇日文， 所以看圖識字咁就揀咗兩個貌似係鍋而又係餐牌裏面睇都幾豐富既set

好啦首先嚟既原來係個飛驒牛味噌陶板燒定食嚟嘅，雖然佢唔係鍋，但係個鐵板燃燒緊個牛肉嘅時候啲油脂係勁香，所以我個人係好收貨㗎（我甚至喺度諗應該會比起個鍋更加好食）

╰(*´︶`*)╯♡

再來一個原來佢都唔係鍋嚟，係個牛肉茶泡飯，今次啲牛肉係事先炒好咗再放上飯面，做法有少少似煲仔飯，隔離有壺茶俾你可以有兩種食法，都幾得意。套餐有跟一碟河豚，咁大個女第一次食河豚，其實冇想像中咁特別，不過都唔錯嘅。

店名：とと家

地址：岐阜縣飛騨市古川町殿町 10-19 (

營業時間：10:00-14:00 17:00~21:00

4）好pure好true既飛驒牛乳

飛驒牛乳又係名古屋一大名物，不過我諗呢個唔一定要喺高山先飲到，我諗好多地方都會有得賣，便利店就未必有因為我冇見過

係好真摯既牛乳味，我唔識形容ƪ(˘⌣˘)ʃ我是咪直接飲緊隻牛啲奶...

5)飛驒牛乳雪糕

睇到呢度係咪覺得又係‘飛驒’啊～

無錯呢個就係名古屋既特色，佢味道完全同飛驒牛乳係一樣，都一樣係咁真摯lol

真到會食到少少羶味

地址:白川鄉

6）CP值爆燈迴轉壽司

呢間野據聞係要排好長隊嘅，但好彩我哋去嘅時候冇乜人可能係時段問題一入就有位

望住部iPad勁興奮睇吓有乜食先....

食物種類繁多，好多款式都未見過，睇到眼都花埋

呢度最抵最推薦係有好多唔同配搭嘅組合拼盤，好似三点盛り、五点盛り，俾起你散叫抵好多，我哋分別叫咗盤吞拿魚同三文魚五食，件件都咁好食咁甜，完全唔知咩叫腥ƪ(˘⌣˘)ʃ

好抵食埋單每人＄200唔使係食到超飽！

店名：もりもり寿し金沢駅前店

地址：石川県金沢市堀川新町3-1 金沢フォーラス 6F（金澤車站旁FORUS百貨公司6F）

電話：076-265-3510

營業時間：11:00～22:00

7）當做香箱蟹丼、手握壽司

店舖十分細，環境有啲狹窄

呢一間海鮮店的海鮮丼人氣NO.1，但我哋偏偏冇揀到，反而揀咗另一個香箱蟹丼，因為呢個季節香箱蟹當做當然要試。

成隻蟹拆解再完整擺位上菜，相當有氣勢，蟹肉肉質鮮甜，非常新鮮，啖啖肉的

另外再叫多客手握壽司，握壽司各個都很得李生好評，壽司米握得確實很好，魚肉都很新鮮，口感細緻綿密，鮮甜海味在口中不斷漫開。

店名:いきいき亭 (近江町店)

電話:076-222-262 (週4公休)

地址:石川縣金沢市青草町88 (近江町いちば館 1F) JR金澤車站徒步15分鐘

營業時間：07:00～17:00

8）海鮮丼

無錯又係海鮮！！！仲要係同一個市場內第二間lol 今次係10分有氣勢嘅海鮮丼，上面有金澤名物金箔點綴

又係位於近江市場裏面嘅一間海產店，佢最出名就係個爆瀉海鮮丼，裏面最豐富嘅包含有12款海鮮，款款都咁新鮮，用料新鮮鮮甜，醋飯使用的是石川縣能登半島所生產的稻米，口感也很不錯而且一啲都唔貴，好似呢個咁樣都唔使＄200港紙抵到欄，隔離再叫多個是日精選壽司，就係當日店舖捕獲到啲咩新鮮就用來做壽司，都一樣係咁新鮮鮮甜，讚讚讚！

山さん　Yamasan

地址：石川県金沢市下近江町68 （金沢近江町市場内）

營業時間：07:30~17:00

TEL:076-221-0055

9）名古屋手羽先(炸雞翅)

去名古屋又點可以唔食雞翅，出發之前我搵咗好多間都係出名食雞翼嘅，但我冇搵到食雞翼專門店嘅鋪反而搵咗間居酒屋

我哋叫咗好幾樣嘢食而我認為佢最好食係名古屋手羽先(炸雞翅)，做法係祖傳招牌味道偏甜介乎於炸同煎之間。隔離係紅味噌雞肉串，這串雞肉串外表看起來很過火，但雞肉卻軟嫩多汁，配啤酒喝一絕。右下是味噌寬麵

寬麵是名古屋的名產，以雞湯煮麵，中途加入味噌，對我來講，味噌湯底重鹹了一點，一般...所以我會認為定係點上面果兩樣已經夠

伍味酉本店 (Gomitori)

地址：日本愛知縣名古屋市中區榮 3-9-13

營業時間：17:00～翌5:00 (無休)

10）米餅串燒

呢到人氣第一係呢個外表睇來似牛肉串燒的おかき，中文大概可譯做米餅。另可加上無料沙律醬。咬啖試試（當然就無牛肉味啦），醬油味比預期中淡，令我最驚喜係おかき原來不是脆的，是帶點嚼勁，像是吃不太Q軟的燒年糕般。不過其實我覺得呢個一般可以唔試_φ(‧_‧

嚟緊我會分享埋京都有咩好食，推介啲比較少人知嘅鋪頭，如果你地有興趣睇埋我下一篇報道或者想跟貼我嘅最新消息就快啲follow我嘅Instagram:__ali.c ，跟住我去吃喝玩樂lalalaaaƪ(˘⌣˘)ʃ