【賽後報告 – HK100】 人生中的第一個100K Solo

【賽後報告 – HK100】 人生中的第一個100K Solo

Lifestyle 生活 · Fitness 瘦身 · Bloggers 專欄
By Sapphire on 04 Dec 2018

2018年1月27日,一個超級難忘嘅日子,因為係我人生中第一個個人100公里賽事

今年天氣好好,雖然濕度高咗啲,但係溫度低,間中有涼風,絕對係一個好舒服嘅天氣!
但係自知長課不足,頭50K但求減少乳酸嘅積聚,淨係用一個快行嘅pacing。


介紹返頭50K先,算輕鬆嘅,只係上一上西灣山同雞公山,要特別注意嘅係,去到CP1前,會經過2次沙灘,浪茄同咸田灣,記得要用腳套,咁就可以避免有沙入鞋,我倒左好多次沙,連鞋墊都拆埋出黎,都總係覺得有沙咁....

CP1前會經過兩次沙灘

上西灣山途中

去到CP5企嶺下,一切感覺良好,換鞋換衫,就繼續出發!

好戲在後頭,上馬鞍山嘅時候,感覺仲有氣有力,一面上,一面load返起成段路嘅地勢,諗住落山嘅時候就追返d時間,唔知係咪因為心急,落山嘅時候feel到ITB想發出黎,即刻按返鬆就住落,點知ITB唔痛,就變腳踝痛,落到山腳涼亭,按返鬆返d就繼續去,上到基維爾問first aid站借按摩膏,食左d Pasta,就繼續跑,之後就慘不忍睹。。。

CP6 基維爾營地

腳仔開始投訴,再加上唔知點解嘅胃痛,仲要低低能能咁跟人行錯路(明明一條麥徑點解咁都可以行得錯)幾經轉接,終於去到筆架山。。。
筆架山嘅義工,都好窩心,見我坐低左,就問我有冇嘢要幫手,仲幫我鋪埋氈,即刻好想返屋企,有咁貼心嘅服務,不自覺地休息得耐左。。。

CP7-筆架山,實在太邪惡啦~
義工們見到參加者坐底就會遞氈,又會問你要咩補給,休息耐d都唔想再行.....

一起步就黎料啦。。。乳酸出晒嚟,落山要靠pole落,痛到唔想再行,去到大埔道見到好多人喺度等巴士,有一刻衝動,不如算啦。。。不過已經行到73K ,差個少少,冇理由行埋佢㗎!於是用pole篤下篤下咁去城門,一面上山,一面問點解要自己攞苦嚟辛,負面情緒出晒嚟

去到城門,見到Supporter,諗起仲有個針草帽,真係好想返屋企。。。佢係咁話得返17K咋嘛,三個鐘行完啦。。。心諗我又唔係你,平時冇事冇幹,都要跑下先meet到呢個時間啦。。。更何況移家。。。就係咁,就俾佢推咗我出發喇

城門水塘CP,心底裡勁想quit….

上針山嘅樓梯,義工用粉筆寫滿左打氣嘅字句,響意志力薄弱嘅時間,真係一個幾大嘅動力!去到草山,開始眼訓,迷住上山。到沿礦抝CP,睇一睇時間,仲有三個鐘,先到二十四小時, keep住行都應該夠時間返終點,快速補給後,又繼續起行。

上四方亭途中,都幾大風,好彩著左件WED'ZE Fresh Warm,保暖得黎又唔焗,一件啱啱好,而且我嗰件係連埋口罩,唔洗吹到面都痛 (*真心暖,唔係賣廣告)
上大帽山嘅時候,已經係六點鐘,準備天光,對於嗜睡如命嘅我,周生急call,好似斷左片咁,意識都係行緊,但冇左靈魂,醉住上山。。。
差不多上到山頂,聽到打氣噹噹,呢個位都有義工!?辛苦曬,一定凍到死
落山好想jog落去,不過腳痛到一個點,連掂地都有d困難,忍唔住大叫,係咁同自己講最後一段啦,頂住啦!
落到閘口,最後一段山路,落樓梯反而冇落馬路咁痛,而且聽到終點司儀嘅廣播,神經開始麻木,係咁同自己講:「到啦到啦到啦到啦」,去到公園位,好想跑落去,用平時嘅form又痛,即刻諗返起平時做drill點樣跳樓梯,於是就跳住落終點......

衝線嘅一刻喊左出黎,唔係因為感動,係因為我隻腳真係好痛.....

衝線嘅一刻….

有好野食,心情即刻好返~

想知多d詳情:
Vibram® Hong Kong 100 Ultra Trail® Race
日期:19-20 January 2019
時間:08:00 (19Jan) – 14:00 (20Jan)
地點:北潭涌 至 大帽山扶輪公園
http://www.hk100-ultra.com/


我係SporTi
Facebook Page: https://www.facebook.com/SporTiBlog/
Instagram: https://www.instagram.com/canettichung/


【誠徵Bloggers!】想分享你的美容、時尚、感情和生活日常,請將投稿連同不多於100字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!
山系探險女生 愛挑戰·愛探索 Love Nature · Love Adventure https://www.instagram.com/canettichung/

Follow Instagram: girls.presslogic

Share to Facebook