終於等到你哋喇！5個嚟緊會踩上紅館嘅歌手同組合，係演唱會上一齊細聽返當年燴炙人口嘅歌曲啦！

紅館對於每個歌手嚟講都係佢哋嘅終極夢想，而哩5個嚟緊會踩上紅館嘅歌星同組合努力踏足夢想，相信好多人當年都聽過佢哋唱出唔少燴炙人口嘅歌曲，今次終於等到你哋首次或再次踏足紅館哩個夢想大舞台啦～

1. C AllStar（2017年10月20日 ‑ 21日）

2009年成軍嘅實力派人氣樂隊C AllStar繼2014年後，今次係佢哋第二次踏足紅館開演唱會！不過完成哩個《生於C AllStar》演唱會後，佢哋就會作出獨立發展！不過釗峰就表示佢哋只係肉體分開，而靈魂同精神都會同在！

好多人都係因為聽咗《天梯》而認識佢哋，平時都係以C AllStar叫佢哋，唔知大家又知唔知佢哋全部人嘅名呢？成員包括有梁釗峰（釗峰）、陳健安（On仔）、吳崇銘（King）同何建曦（Jase），四子都有有獨特聲線及同唱功，以唱無伴奏合唱為主！

C AllStar四子每次出現都以相同dress code現身，不單感情要好，亦非常有團隊合作精神㗎！既然今次會係最後一個以組合現身嘅演唱會，相信各位粉絲又係一票難求！

2. 側田（2017年12月8日 ‑ 9日）

側田就離開過香港娛樂圈一段時間，5年後再度返嚟紅館開演唱會，真係令到一眾粉絲都相當興奮！一出道以獨特嘅唱腔加上大眾化嘅情歌成功俘虜粉絲嘅心，好似當時「好人」、「Erica」、「命硬」、「我有今日」等主打歌都大獲好評！

當時可謂炙手可熱嘅新人，獲獎無數，前途無可限量！後來更先後係紅館開過4次個人演唱會，每場都非常爆滿！

側田近哩兩年都有上內地參加歌唱節目，亦開始令佢係內地大大提升知名度，不過側田依然都冇忘記過香港嘅一班粉絲，等咗咁耐，今次真係要努力去搶飛啦！

3. 衛蘭（2018年1月）

衛蘭（Janice）早前就宣佈將會係2018年於紅館舉行佢第四次個人演唱會，咁耐冇聽到Janice嘅消息，今次一嚟就為我哋送上咁好嘅消息，真係令人好期待！

擁有中菲韓混血兒嘅Janice喺2004年出道，樣子鬼鬼地丙加上超甜美獨特唱腔令佢得到好多人注意，一出道就成功橫掃哂各大音樂頒獎典禮嘅新人獎項，亦係樂壇近年冒起得最快嘅實力派女歌手之一！

之前King Jer搞嘅「最靚聲歌手」比賽中，Janice就被網民票選為第一名，其實以佢歌唱實力加完美聲線，絕對係實至名歸！今次又可以係佢演唱會上聽到佢把靚聲啦～

4. Shine （2018年3月2日）

早前Shine喺Facebook上宣佈入紙成功，2018年3月將會舉行佢哋嘅首次紅館演唱會！不過為咗今次嘅個人演唱會，Shine其實之前都入紙過6次，到第7次先成功申請到紅館檔期，真係令人好感動！

以前香港嘅組合真係紅極一時，除咗Twins、Boyz，相信Shine都係好多80、90後嘅回憶，兩位陽光男孩一出道就已經成功迷倒好多少女心！

當然佢哋亦有好多為人所熟悉嘅歌，如「半成年」、「簡單而隆重」、「祖與占」、「燕尾蝶」等等，雖然係2007年宣布作個人發展，令到好多粉絲都傷心！不過今次見佢哋強勢回歸，絕對值得買飛入場睇呀！

5. Twins（2018年5月-待公佈）

Twins哩兩個孖公仔絕對喺好多80、90後心中無人可取代嘅回憶！真係冇咩人會唔識佢哋嘅歌，而今年5月佢哋都仲開緊LOL世界巡迴演唱會，上年年頭先係香港開完演唱會嘅佢哋，今年就無望會踏足紅館喇！

但係今年4月推出咗新歌《有約》嘅佢哋，就表示正嘗試入紙紅館，希望2018年5月可以同大家「有約」喺紅館開演唱會！

雖然詳細消息就仲未有公佈，不過如果佢哋真係入紙成功，一眾80、90後又要嚟搶飛啦！希望到時佢哋可以開多幾場啦～

想重聽返各位實力派歌手+童年回憾？大家記得mark實演唱會時間，到時開賣時去搶票啦～

Source：Google