90後的集體回憶！盤點唱K必唱嘅十首歌合唱歌，Cut歌前必點《勁歌金曲》！

講到以前同朋友最鐘意做嘅事，其中一樣一定係唱K！特別係以前嘅K-lunch、K-Buffet都勁抵勁平，有時學校提早放學或者生日Party都一定會去唱K！而家就等小編同大家盤點十首唱K必唱嘅合唱歌，全部都係睇到歌名都識哼兩句呀～

# 方力申 & 鄧麗欣系列

當年方力申同Stephy哩對情侶檔推出過三隻經典合唱歌曲：《好心好報》、《好好戀愛》、《十分愛》

好多女仔一聽到前奏已經識唱！「落力為你好 得不到分數」、「共你相識三千天 我沒名無姓」、哩啲絕對係MK時代時，喺MSN／Xanga會打嘅歌詞呀！

仲有唱到「早知不應試愛」時，同你合唱嘅Partner會勁有默契地唱「未放開」～直情唔洗睇歌詞都識唱！

# 死性不改 - Boyz & Twins

當Twins同Boyz最紅嘅時候就出現咗哩隻合唱歌，唱K時嘅重點係，連讀白都一定要同Partner讀埋：「點解要咁啫、點解唔可以咁呀、你唔覺得好辛苦咩、辛苦..... 但係我鍾意呀、算把啦..」

# 一事無成 - 鄭融 & 周柏豪

「一事無成」完全係MK時代必唱嘅金曲，特別係男女聲都容易唱，而且冇乜高音位，啱哂一啲好似小編咁嘅音痴唱呀～

# 滄海遺珠 - 謝安琪 & 劉浩龍

本身原唱者都係唱得之人，如果你身邊有返咁上下唱功嘅朋友都會點哩隻！

# 男人信甚麼 - JW&衛蘭

近年同閨蜜去唱K都會點哩隻歌嚟唱，如果撞正有朋友失戀就更加會點「男人信甚麼」嚟憑歌寄意～不過個MV真係好奇怪⋯⋯

# 勾手指尾 - 鍾一憲 & 麥貝夷

哩隻歌Sweet到所有熱戀中嘅情侶都會合唱呀～

# 苦口良藥 - 許志安 & 陳慧珊

如果係細個勁鐘意睇TVB劇嘅妳地一定識得唱哩隻歌～雖然係TVB劇集嘅主題曲，但係傳唱度都極高！

# 滾 - 梁漢文 & 楊千嬅

「請你滾 滾出去⋯⋯」炒熱氣氛必備！

# 狂串樂基兒 - 古巨基 & 容祖兒

講到近年經典男女合唱，一定唔少得哩隻「狂串樂基兒」！哩隻串燒歌長達12分41秒，亦包括容祖兒同古巨基嘅經典曲目「我的驕傲」、「習慣失戀」、「愛與誠」、「歡樂今霄」等等⋯⋯作為90後嘅你一定識唱！

# 勁歌金曲 - 古巨基

根據非正式統計，去到唱K尾聲有90%人會點勁歌金曲！因為哩隻歌有成10分鐘咁長，同「狂串樂基兒」一樣，絕對係拖時間之選～雖然入面嘅歌都比較Old School，但係80、90後就算唔識唱哂全首，都會識得唱Chorus！

每個人唱K都有自己嘅心水推介，除咗以上哩十首之外，唔知你地又鐘意同朋友合唱咩歌呢？

Text ：Girls Editorial
Photo Source：YouTube