復出返娘家拍劇？鍾嘉欣楊怡確認拍《再創世紀》，TVB豪擲上億陣容請實力派外援救收視！

自大台流失咗一班演得之人，收視率都真喺唔多掂！TVB搞盡腦汁，終於都諗到對策，就喺請返離巢之人返娘家拍經典劇集－《再創世紀》，今次TVB不惜豪擲上億陣容，請嚟楊怡、周麗淇、周栢豪、林文龍等外援，再加埋旗下藝人鍾嘉欣、郭晉安等，實行以實力演員救收視！

自好多花旦、小生上內地拉撈真銀，TVB要搵幾個演得同時兼備觀眾緣嘅人真喺買少見！

除咗離巢，好多當年嘅花旦都紛紛走去築愛巢，結婚生B努力組織幸福家庭，已經唔會好多年輕時，將全副心機放喺事業上。

見到TVB而家啲劇集同新晉演員，好多粉絲都表示好掛住當年大台實力小生花旦興盛嘅時代！

有見及此，TVB當然都識做，立即請嚟一眾實力派外援救災，決定用經典劇集－《創世紀》為由，並且豪擲上億資金開拍劇集《再創世紀》，令好劇集同巨大資金吸引佢哋返嚟！

成套劇有36集，當中更以每集5萬請返當年當紅花旦楊怡，咁計法佢一個人嘅片酬都已經有一百八十萬！不過楊怡一直都好有觀眾緣，相信今次以高價請佢返嚟出山，絕對有能力救到收視！

為咗方便鍾嘉欣湊B，仲為鍾嘉欣度身訂造劇本，TVB非常貼心咁安排佢嘅戲份，全部喺溫哥華取景，等佢可以一邊專心拍劇，放工返到屋企就可以湊B，唔駛同囡囡兩地相隔！

而另外亦請嚟同麗淇助陣，其實當年周麗淇都拍過唔少TVB劇集，如《秀才遇著兵》、《天幕下的戀人》、《最美麗的第七天》等，有幾套仲擔正做女一，都吸咗唔少忠實嘅電視粉㗎！

男角方面除咗搵返《創世紀》嘅靈魂人物「馬志強」（郭晉安飾），仲有林文龍、袁偉豪、周栢豪等一眾入屋型男一齊參與演出，相信令唔少少女觀眾都期待呀！

今次劇集背景主要圍繞近10年香港金融經濟發展，並會喺7月開拍，TVB預計要一年時間製作，應該出年就有得睇！

其實當年1999年播放嘅《創世紀》同2000年嘅《創世紀II天地有情》，無論收視定口碑都得到大家盛讚，相隔18年，TVB今次咁重本以上億陣容加製作，又會唔會成功打造到另一個神話呢？

Source：TVB/FACEBOOK/GOOGLE