公認好仔仔！6個娛樂圈將老婆放喺第一位嘅絕種愛妻號型男，婚後從此成為「緋聞絕緣體」！

娛樂圈哩個大染缸，要搵一個被人人都讚好嘅好仔仔都真係唔容易！要成為公認嘅好仔，除咗自己個性好，仲要愛鍚老婆，將老婆放係第一位！以下哩6個娛樂圈友公認嘅最強愛妻號，唔知你哋嘅心水係邊個呢？

#01 張繼聰

張繼聰同謝安琪哩對樂壇嘅恩愛夫妻，真係令到唔少人都羨慕～當年仲係初出道嘅謝安琪係2006年11月突然公開宣佈已經懷孕3個月，之後係2007年初就同張繼聰結婚

其實謝安琪比張繼聰大3歲，而當時謝安琪係樂壇已經有名氣，但張繼聰事業就一般，所以兩人嘅愛情一直不被看好！

兩人結婚後，相信最令人印象深刻一定係張繼聰係2007年首奪叱咤樂壇作曲人大獎時對太太告白：「我想多謝太太同我個仔，過去一年，我聽過好多祝福說話，都聽過好多難堪說話。我記得有一晚，我睇住太太瞓覺。當晚是很大壓力的晚上，我好難過，我唔知講咩說話安慰佢，但我同自己講，我一定要照顧好太太，照顧我兒子，就算時光倒數幾多次，我都會娶你做老婆，我愛你，Kay！」

後來開始拍劇嘅張繼聰開始有返人氣~而家除咗忙工作，佢都會為屋企人花盡唔少心思，好似係今年啱啱出世嘅囡囡Karina，係剛過去嘅囡囡百日宴就同佢開PARTY慶祝，同時都不忘慶祝埋兩人嘅結婚十周年紀念，為老婆送上一個小小驚喜～

而家謝安琪將重心放返係屋企，已經暫別樂壇一段時間，而近年人氣極高嘅張繼聰當然會為咗屋企人努力搵真銀，實行「男主外、女主內」嘅方式，等謝安琪放心湊B～有時仲會係網上放閃，令人好多人都表示羨慕！

#02 張智霖　

係1993年係張智霖Chilam同袁詠儀靚靚開始拍拖嘅時候，不過因為當時女方嘅人氣大，而男方就只係只因唱咗一首《現代愛情故事》而小有名氣，不過論知名度仍然同袁詠儀有好大差距～

因為女強男弱嘅關係，好多人都覺得佢哋感情易破裂～而最終佢哋都有收成正果，係2015年，佢哋仲一齊參加內地節目《一路有你》，兩人係節目中一時互相鬥咀，一時又盡顯恩愛，令到觀眾都感到好甜～

Chilam同靚靚結婚16年，都無論咩節日，Chilam有時間都一定會同靚靚一齊慶祝，依舊好似熱戀時咁恩愛！

即使已經結婚咁耐，Chilam依然都仲識浪漫，不時為老婆製造小驚喜，希望老婆無時無刻都咁開心～

連坐係車上自拍，佢哋都會拖住手㗎！絕對會閃死人呀！

兩人都咁高嘅顏值，仔仔當然都一樣咁靚仔啦～唔知長大後會唔會型得過老豆Chilam呢？

#03 劉青雲 郭藹明

見到哩一pair，即時令人諗起當年劉青雲以《竊聽風雲3》二度係香港金像獎稱帝，係台上對郭藹明講嘅「太空宣言」，「每次我搭太空船不知道去哪邊時，妳總會讓我安全回到地球，多謝妳！」

雖然大家都唔明白真正意思，但聽到劉青雲對郭藹明嘅大聲告白，都覺得一樣好感動呀！劉青雲同郭藹明一齊咗25年，至今仍恩愛甜蜜，係娛樂圈嘅模範夫妻！

兩人戀情係1992年拍攝TVB劇集《大時代》認識，拍攝完劇集兩人先擦出愛火花而開始拍拖，1998年結婚後，經常都被拍到兩人幸福出巡，而且重點係兩人自拍拖到婚後都依然係零緋聞！

劉青雲一直都專注電影事業同老婆，至於郭藹明係2006年後淡出幕前，而家就享受幸福少奶奶生活～

#04 陳豪

陳豪同陳茵媺婚後除咗享受婚姻生活，而且都有努力做人，至今已經生咗3個可愛嘅仔仔啦～

佢哋每次同框時，都表現得極之恩愛！而陳豪亦因為屋企人，即使當年嘅小生花旦都上內地搵銀，陳豪都留守tvb，為嘅係唔想離開屋企人太耐時間～

而係今年靚媽陳茵媺36歲生日時，陳豪都有放低手上工作陪老婆過生日！陳茵媺仲係微博哂幸福，相中陳豪準備咗一個立體公仔蛋糕，蛋糕上五個公仔代表佢哋一家五口，上面寫著「Happy Birthday to my Super-mommy」粉絲見到都甜到入心呀！

#05 黃浩然

2014年都仲係黃浩然事業嘅高峰期，但努力工作嘅佢就唔小心捱出病來，最終證實患上「貝塞特氏症」導致喉嚨發炎潰瘍，所以要全面停工！

黃浩然身體唔舒服時，太太就要照顧兩個小朋友，又要去醫院照顧老公，即使再辛苦，太太都依然悉心撐起頭家！當黃浩然病好出院，第一時間開口多謝太太！

係鬼門關兜咗一圈嘅黃浩然，開始明白健康嘅重要，所以開始注意養生之餘！亦感謝太太當時嘅不離不棄，學識更珍惜屋企人！「記得出院後，阿仔見到我的一刻，笑得非常燦爛，我感動到眼濕濕。多謝老婆嗰陣一人頂住頭家，我知道我要努力賺錢之餘，更重要是維持健康，才能保護家人。」

生日咁重要嘅日子，黃浩然當然會同兩個囝囝加老婆一齊好好慶祝啦～

#06 王祖藍

王祖藍雖然唔係一個型男，但就絕對係百分百嘅愛妻號！哩對最萌長短腳之戀嘅夫妻婚前婚後都sweet到爆！

早前結婚兩週年仲去咗馬爾代夫慶祝兼拍咗超多甜蜜寫真夫妻照！雙方仲係對方微博留言，大放閃光彈：「老公／老婆，情人節快樂，結婚兩週年快樂」

其實王祖藍同亞男喺06年已係教會秘密撻着，但因為當時祖藍冇咩名氣，覺得自己襯唔起亞男，最終一齊咗好短時間就分開！3年後，憑著祖藍嘅實力令佢事業有返起息，工作機會接踵而來！

到2009年，祖藍決定重新追返亞男，寫咗一封情信同自己寫嘅歌《跌落凡間的天使》送俾亞男，最終兩人就走一齊返，相信大家最記得一定係祖藍係無線節目《萬千星輝賀台慶》中，當著全港700萬觀眾面前，跪地向亞男求婚～

兩人最終2015年係迪士尼舉行婚禮，自此祖藍就將亞男當公主般寵愛佢，佢哋嘅愛情就好似童話般浪漫！

除咗以上6個愛妻號，你哋仲諗唔諗到其他愛妻號型男呢？

Source：instagram/Weibo