宇宙級靚聲合唱！G.E.M. 林欣彤同台合唱《A.I.N.Y 愛你》，兩大實力巨肺你撐邊個？

有「宇宙G.E.M.」之稱嘅鄧紫棋近排就返香港宣傳9月嘅紅館演唱會，難得回港嘅佢更加上到無線參加節目《流行經典50強》一展歌喉。G.E.M.首先喺台上唱出成名作<睡公主>，之後再輪到佢嘅首本名曲<A.I.N.Y. 愛你>。然後重點就嚟喇，林欣彤作為嘉賓現身，同G.E.M.一齊大唱「兒夜姨野以夜儀野」，成為全晚高潮！

唔講咁多，去片！

林欣彤當年參加《超級巨星2》，就係靠呢首<A.I.N.Y. >一唱成名，而呢首歌亦係G.E.M.嘅代表作之一，每次表演佢都會以靚聲同巨肺將呢首歌演繹得淋漓盡致！今次佢兩個歷史性同台合唱，除左和諧嘅和音令人聽出耳油外，二人更喺副歌環節分別各唱一句「兒夜姨野以夜儀野」，展現獨有嘅巨肺唱功！

兩人嘅唱功各有特色，有人覺得阿Mag唱得有感情多啲，亦有網民大讚G.E.M.高音準轉音靚，唔知大家又鍾意邊個嘅演繹多啲呢？

網民喺聽歌之餘，亦都評論起兩人嘅衣著。有時裝車禍之稱嘅G.E.M.居然放棄佢心愛嘅皮褲，以白色緊身Crop top配黑色闊腳褲上陣，唔少網民都話咁著順眼好多！相反林欣彤著起短褲大騷長腿，但網民反而嫌佢大隻咁話喎，大家又點睇？

Source：Youtube，TVB