「鵝公喉」再開聲！絕世美女張柏芝開live預告年底出新碟，12年後再出新歌你哋又支唔支持？

唔知大家對張柏芝有咩印象呢？絕世美女、演員、好媽媽？其實佢除咗有哩啲身份，以前嘅佢仲係一位歌手，曾經唱過唔少街知巷聞嘅歌曲～而之前佢就係Instagram開live同粉絲宣佈咗一個喜訊，表示年底會出新碟，仲同網民公開邀歌～

柏芝係1998年出道，而係1999年柏芝就正式推出首張EP《任何天氣》，而且推出後反應非常熱烈，短短幾個星期就已經售出白金數量～

當時嘅佢，都唱過唔少炙手可熱嘅經典歌曲，而且好多都係唔少少女唱k必點嘅歌，包括《星語心願》、《忘了忘不了》、《賭愛》等等，首首聽前奏就已經背到耳熟能詳啦～

不過對於柏芝嘅唱功，評語就好兩極化，雖然歌曲好聽，但就畀網民話佢把聲有啲沙沙地，似「鵝公喉」，完全唱唔出味道！

今次柏芝為咗出碟都有努力㗎！佢開live時就同粉絲透露自己已經戒咗煙，所以今次嘅專輯效果可能會好啲，好聽啲，唱歌時會比較輕，同埋都會比較高音～睇嚟今次可以一洗「鵝公喉」多年嘅標誌！

柏芝仲話如果時間趕得到，會想喺年底之前出新碟！栢芝為咗兼顧到兩地粉絲，就話：「公平一啲，廣東話同國語歌都會有，可能兩首香港、兩首內地，咁樣就大家都可以一齊分享！」

而且今次柏芝仲公開同網民收歌，即使唔太專業，只要係好嘅作品，都可以send email畀佢經理人㗎～各位創作人快啲寫定幾首好歌畀栢芝，可能有機會收錄入去栢芝新碟㗎！

如果柏芝今次真係成功出到碟，佢表示會喺香港同內地都搞過小型見面會，同粉絲嚟個近距離嘅接觸～可以見到「凍齡女神」柏芝真人，相信係好多粉絲嘅夢想！

柏芝相隔12年後再出新歌，你哋又點睇呢？

Source：Facebook@張柏芝 cecilia cheung/Google