25年綠葉王內地發圍！TVB「御用傻仔」戴耀明做電影男一，網友：支持做一拳超人真人版！

相信有睇開TVB嘅觀眾，心入面總有幾個永遠都叫唔出個真名嘅綠葉演員！雖然佢地做親都唔係啲咩大角色，但係見到佢地總係會有種親切感～講到TVB嘅「御用傻仔」，你又係咪會諗起佢呢？

一直都係做開配角嘅戴耀明，自從《鐵馬尋橋》入面排長一角開始受到網民注意，之後《巾幗梟雄之義海豪情》飾演嘅日本皇軍向山達也都算係戴耀明嘅代表角色之一！

當然唔少得係《EU超時任務》被網友譽為神之生理演技嘅「動L哥」！

係TVB做足25年綠葉，雖然枕住枕住都會係唔同劇集見到佢，不過戲份一直都唔算多！

不過大台出名人工唔高，更何況係唔出名嘅綠葉演員？所以都難怪個個都轉戰返內地搵真銀，香港觀眾心目中嘅綠葉王今次都終於發圍喇！係TVB做開配角，一跳就搖身成為愛奇藝網絡電影《爆裂老婆三歲夫》嘅男一！

其實戴耀明而加慢慢都拍多咗內地劇，好似網劇《大清神捕》同《明朝刺客》！

雖然唔係套套做男主，不過起碼係海報度都見到下樣先，戲份亦都比係TVB重好多！

而加佢仲拍緊TVB新劇《果欄中的江湖大嫂》，仍然都係做佢擅長嘅諧星角色～

雖然而加係內地有男一待遇、保姆車接送亦有私人助手，仲要搵到真銀，不過飲水思源嘅戴耀明雖然接拍唔少內地劇，不過亦都好多謝大台令到大家認識佢，先至有機會拍更多嘅劇畀大家睇咁話！

戴耀明亦都從來唔介意網民攞佢嚟開玩笑，仲自己share埋出嚟添！其實似足咁多個卡通人物，都真係幾難～（笑）

有網民知佢今次發圍，仲話支持佢做日本超hit動漫「一拳超人」真人版添！

source: weibo、facebook