不如叫「嘟姐選港姐」啦！2017港姐競選懶人包，嘟姐一人兩票網民怒轟唔公平要求重選！

雖然唔少市民對於香港小姐競選一早已經唔會抱有任何期望，不過大家都仲會當茶餘飯後笑話咁傾下每年嘅結果！今年《2017香港小姐競選》尋晚就完滿結束，不過大家對今年嘅結果反應竟然特別大，原因唔係因為今年嘅三甲特別靚，而係今年嘅投票制度仲兒戲過當年冧server！冇睇但又想知咩事嘅你，快啲睇落去啦！

今年嘅5強分別係1號何依婷Regina 、4號黃瑋琦Emily、5號雷莊兒、8號伍樂怡Kelly同10號張寶欣Boanne！雖然冧server，但之前都起碼有得全民投票選港姐，但今年竟然玩新賽制，首先宣佈咗季軍，然後再由8位評判投票決定選出冠軍同亞軍！

唔洗劇本大家都估到，8個評判一定係4:4咁投懶緊張咁架喇～不過選港姐又點可以學獎門人話齋「Super打和啦」？賽制一早講明，如果票數打和就會由德高望重嘅DODO姐作最後決定，最終DODO姐再將佢神聖嘅「第二票」投多次畀佢愛將５號雷莊兒，今年港姐冠軍就係咁樣誕生喇！有唔少網民都話，唔好叫《香港小姐競選》，不如延續《DO姐去SHOPPING》叫《DO姐選港姐》啦！

除咗投票制度扼到唔少嬲之外，眼利網民更加發現LIVE嘅環節做假，媽啊真係尷尬到唔敢睇啊！

賽前大熱嘅8號伍樂怡竟然連3甲都不入，仲連豬肉獎都冇分到一個，好多網民都表示戥佢唔抵！加上投票制度又咁唔公平，真係好難唔令人覺得港姐結果根本就係一早內定！

其實KELLY外表真係冇得輸，加上學歷、package都唔錯，而當晚表現其實都幾好，唔少網民話咁嘅表現絕對值得入三甲！

再有網民仔細睇睇冠軍雷莊兒絕對唔惹少，老豆雷葆文原來係香港十大傑出設計師，身家傳聞過億，係商界亦都有頭有面！

睇返雷莊兒自己instagram啲相，唔少網民不禁質疑而加到底係選港姐定菲律賓小姐啊。仲要攞埋「最上鏡小姐」做雙料冠軍，真係難怪大家咁大反應！

出身係模特兒嘅佢，身材當然有返咁上下，不過睇外表就真係唔似香港小姐！

至於亞軍就冇咁大爭議嘅，1號何依婷Regina眼大大笑容甜美，重點係都似返個香港女仔先！

而季軍就由4號黃瑋琦Emily奪得，唔少網民都表示今年港姐都帶有泰國味，你又點睇呢？

不過小編就話落選嘅佳麗又唔洗灰心嘅，因為通常落選嘅港姐發展往往都比三甲更好！三甲？我諗大家過幾日就已經唔會記得佢地個名架喇～（笑）

Text: Girls editorial
Photo Source: instagram、tvb