《爸爸去哪兒5》無視禁令網上開播！帥爸吳尊仔仔超可愛，陳小春同仔仔簡直係餅印～

喺大陸好收得嘅《爸爸去哪兒》已經開到第5季啦，今集最觸目嘅嘉賓一定係陳小春同仔仔Jasper～事緣大陸網民好鐘意以前古惑仔系列電影，所以佢地都會叫陳小春做山雞哥，仲話好期待山雞哥同仔仔嘅演出添～

內地綜藝節目《爸爸去哪兒5》被中國廣電總局下令禁播，但係湖南衛視一於唔理咁多，9月7號下午12點喺芒果TV同埋YouTube播出先導片～

之前公開嘅預告已經勁Sell溫情，陳小春扮老人家對住鏡頭講經。之前陳小春夫婦Po相都會遮住Jasper個樣，所以今次係佢地第一次公開Jasper樣貌！同山雞哥真係超似樣，直情係餅印咁呀～

喺今日開播嘅《爸爸去哪兒5》，打頭炮第一個就係陳小春一家～Jasper大Show兩文三語，一時講普通話，一時講英文，啲口音仲要勁Cute！

應采兒大曝陳小春冇試過單獨湊仔超過6個鐘，仲叫節目組唔好比佢地有太多時間相處～話口未完，陳小春就拎住把玩具槍射Jasper，名乎其實係個大細路！

問到想不想跟爸爸去旅行，Jasper說：「我只是不願跟爸爸去，因為我喜歡跟媽媽還有爸爸一起去」～Jasper其實係一個小暖男，係今集嘅任務裡面，只係要求同爸爸做一世好朋友，最後仲要加句I Love You Dad！唔怪之得山雞哥係仔仔面前都變得溫馴哂啦～

吳尊都帶埋一對仔女上節目，真係咁多年都Keep住童顏，實在估唔到佢已經有一對仔女～NeiNei同Max平時都用英文溝通，所以講普通話都有少少生疏，剩係識講少少基本生活用字～

吳尊雖然同一家人係汶萊生活，但係都要一對仔女學普通話～仔仔Max已經識講1至10嘅普通話啦，把聲超萌之餘仲要勁鬼馬！

之前一直都遮住仔仔個樣，因為節目出街，所以吳尊亦都係微博公開仔仔正面相，真係勁得意！！！

見到呢幾個小朋友咁Cute Cute，真係好期待下一集呀～

Text Source：Girls Editorial

Photo Source：Weibo, YouTube