Never冇死到？《踩過界》港版內地版結局大不同，留兩大伏筆位為續集舖定後路？

陪咗大家三個月嘅《踩過界》尋晚終於大結局喇！不過其實係未開播之前，大家都一早知道大陸愛奇藝已經有哂足本版本播放，有冇人好似小編咁堅持跟香港節奏睇哂全套劇？不過原來監製一早就有講過，大陸版同港版大結局將會有少少唔同，而有啲細節位亦都係香港版先有，究竟今次留低嘅兩大伏筆位係咩？

大陸版本入面，李佳芯飾演嘅Never畀戴德仁推咗落山崖之後就再冇出現，觀眾嘅解讀當然係Never為咗令戴德仁以為自己同支凶槍會永遠消失而犧牲自己啦～

而係香港結局入面，前半part其實劇情都一樣，Gogo被判終生監禁，盲俠跟住Never留低嘅線索搵返支凶槍；不過因為同一條罪唔可以告第二次嘅關係，盲俠都係要自己出手逼戴德仁講真話，之後先至告得佢入。

最後Gogo終於放返出嚟，同盲俠癲姐團聚，而大陸版本去到呢到就已經完咗。不過係港版結局入面，係播哂credit之後就留咗個彩蛋畀香港觀眾！

彩蛋入面，盲俠、癲姐、Gogo三個人係法院門口傾計，而Never就無啦啦出現返，本身以為係又玩人有相似或者孖生姐妹啲老套野啦，點知就連四感超強嘅盲俠都話啲腳步聲係同Never一樣，咁即係暗示Never真係冇死到？

不過Never就一句野都冇講，加入三劍俠之後就一齊向前行，咁就完咗喇！

其實劇入面對於Never嘅生死仲有一個伏筆位，就係當盲俠去認屍嗰陣，佢好肯定咁講：呢個人唔係Never嚟！雖然合理推測係因為當時條屍已經浸到發脹哂所以同當初嘅樣已經唔同，不過劇入面盲俠咁萬能兼四感咁強，又點會畀呢啲「表象」蒙蔽？盲粉表示總之盲俠話佢唔係，就唔係！（笑）

唔少網民話呢一套劇係TVB近期最高質嘅劇集之一，除咗有靚仔有型嘅王浩信演技大爆發，加上有拋開咗包袱嘅達哥蔡思貝，仲有靚女豪放李佳芯同鬼馬張振朗，呢個組合的確幾有觀眾緣！

不過唔少觀眾都覺得Yanice同盲俠呢pair好可惜，由EU到踩過界都係sad ending，下次畀返個好結局佢地得唔得啊？作為觀眾嘅小編，都想《踩過界》快啲拍續集啊！如果有續集嘅話，希望Yanice同盲俠可以開花結果啦！(心心眼)

Text: Girls editorial
Photo Source: TVB、instagram