森美「登報道歉」？森美IG誤放黃心穎低胸相被指博出位，心穎反安慰令森美內疚到想喊～

上個禮拜森美帶埋黃心穎、高海寧同麥美恩飛去日本拍攝《森美旅行團》，本來係一件開開心心嘅事，但係因為森美唔為意放咗張心穎BB嘅低胸相喺IG，令到心穎被媒體指「搶Fo可以去到幾盡？」

事緣森美同黃心穎、高Ling同麥美恩係日本街道影咗張團體相，森美原意係同網友開心Share拍攝花絮，同埋多謝幾個小花參加哩個節目拍攝～

但係簡單幾張相卻令到心穎被報章冤枉，因為相中心穎著緊嘅綠色冷衫唔小心拉闊到變左露肩大V領露出事業線。喺森美Po咗相之後，有某啲媒體就話因為身旁嘅高Ling著住件露膊衫，所以心穎係專登搶鏡博出位咁話～

事後森美已經不停向心穎Say Sorry，亦接受翻訪問解釋心穎絕對唔係專登搶Fo而拉低件衫，仲係報章專欄向大眾再解釋＋道歉。其實心穎件衫拉得咁低只係因為影相前要抱住個小朋友，又要擺好多Pose，所以件衫先會因為大動作而拉低咗～內容仲提到心穎反而主動安慰佢，令佢更加覺得唔好意思、內疚到想喊，仲覺得無地自容到想搵窿瓹！

尋日心穎喺IG再回應就話：「無論入行幾耐、睇到負面標題或內容難免會有少少難過、委屈。但係好多時係無人會關心諒解、久而久之、自己都開始忽略自己嘅感受。今次呢個小意外、見到大哥為我被冤枉而難過內疚我先發覺原來係有人會體會㗎。心反而暖一暖、可以話係因禍得福。」其實喺一個咁複雜嘅娛樂圈入面搵到咁真心嘅朋友真係好難得～

對於心穎掉倒頭安慰森美就獲得網民一致讚賞佢係一個胸襟廣闊、好堅強嘅女仔！森美為咗補償心穎仲話：「我欠你嘅，第時你結婚，我一定會還返人情比你！」亦有網民好欣賞森美係一個「找數真漢子」，因為森美有膊頭、肯承擔責任～小編覺得佢地兩個真係娛樂圈嘅好榜樣呀！

今次發生哩件事真係意料之外～見到佢地幾個都Po咗啲拍攝花絮喺IG，齋睇相都覺得哩個組合好有火花～好想快啲有得睇呀！

Text Source：Girl Editorial

Photo Source：Instagram