人生總會有低谷嘅時候！6個谷底反彈嘅男明星，失去過先知道要珍惜每一個機會～

人總係會有處於低谷嘅時候，好多人都會失去堅持嘅動力，或者冇珍惜機會再次翻身。不過以下哩幾位明星就係非常勵志嘅例子，憑住實力同埋努力由谷底反彈，甚至越做越好添呀～

# 謝霆鋒

16歲就出道嘅謝霆鋒因為父母嘅名氣，由細到大都備受矚目。早前佢出席講座都有提到自己「喺噓聲中出道」，另外又喺2002年嘅頂包案而受到社會責備，更曾被香港學生選為該年度「最負面人物」及「2002年風雲人物之首」，形象跌到落谷底！

哩件事之後，謝霆鋒便把工作重心轉移至內地。2014年拍攝大陸綜藝節目《十二道鋒味》勁受大陸觀眾歡迎，由大陸再紅返嚟香港！除咗廚藝了得之外，佢亦都係出名拍攝唔錫身，場場戲都用親自上場拍攝，真係敬業樂業呀！

# 陳偉霆

成日比香港人嘲笑「而我不知道陳偉霆是誰」或者「的士佬」嘅陳偉霆，由2003年入行至2013年長達10年期間都係寂寂無名，最出名就係《Taxi》一曲，同埋比黃曉明笑佢人氣低！

William喺2013年轉戰內地之外一炮而紅，接拍多部電影／電視劇，更加被內地網民封為「國民老公」、「大王」之類嘅美譽。今年更加入圍福布斯名人榜，排名比起劉德華、陳奕迅、謝霆鋒更前，真係吐氣揚眉呀～

# 吳浩康

早於2002年就入行嘅Deep初出道就被冠上「o靚仔版陳奕迅」嘅稱號，仲有幾首Hit歌《孩子王》、《擇日失戀》同埋《洗剪吹》等等～90後一定會識得唱哩幾隻歌～但係喺阿Deep事業如日中天嘅時候，佢被發現藏有小量毒品＋吸毒，自此之後都比較少出現喺公眾前～

之前上Wyman作品展上唱過《洗剪吹》令到好多歌迷都想再聽返佢唱歌～阿Deep終於宣佈年尾開演唱會，仲喺記招落淚多謝經理人Mani不離不棄，佢亦都好感恩有哩個機會可以開演唱會～最近佢成日喺Facebook直播唱歌，真係寶刀未老呀！

# 陳山聰

陳山聰喺2011年同何超雲拍拖，被外界千夫所指話佢為咗追賭王女兒而棄糟糠＋唔理演藝事業陪超雲遊山玩水，例如唔出席所有宣傳活動，令佢嘅專業操守受到質疑，仲被封為「世紀賤男」！

好彩嘅係陳山聰努力彌補過錯，被邀請回巢拍攝劇集洗底成功～近日熱播嘅《同盟》演技出色，獲得網民大讚！哩幾年愛上運動嘅陳山聰仲會同胡說八道會一齊去做Gym／街跑，真係好健康～

# 關楚耀

出道時以「譚詠麟契仔」闖出名堂，但之後同前女友衛詩喺日本吸毒斷正，令到佢形象插水！事後關楚耀暫別娛樂圈一年再復出，除咗唱歌之外亦有拍電影電視例如《喜愛夜蒲》，成績都算唔錯～

近日佢仲接拍TVB劇集《特技人》，成日喺IG Update近況，為咗拍攝效果更加半裸出演，醉心工作嘅關楚耀應該會好好珍惜哩啲機會咖啦～

# 崔建邦

曾經係TVB一線節目主持嘅崔建邦原來仲拎過2007年飛躍進步男藝員大獎！但係2009年崔建邦虐打當時女友鄺敏慧（中巴），被TVB勒令停Job半年後，又因醉駕＋停牌期間駕駛，令佢形象一落千丈！

離開TVB後，Amigo去咗做PA（助理編導）捱足6年，仲慘到連八達通50蚊按金都要拎出嚟用，相信佢捱過辛苦過都已經明白「機會唔係成日有」。今年終於獲得第一個幕前演出機會，嚟緊《跳躍生命線》大家就可以欣賞佢嘅演出啦

Text Source：Girls Editorial

Photo Source：Instagram, Weibo