全部都係靚仔靚女！4個高顏值好演技嘅ViuTV新人，男神、女神之名當之無愧～

Viu TV嘅劇集專門起用新人，比起TVB日見夜見嘅藝人更有新鮮感，而且Viu TV用嘅新人每個都係男神女神級嘅俊男美女，超級養眼呀～

# 莫竣名
出演《入住請敲門》嘅男主持莫竣名Louis，大家有留意廣告都應該唔陌生，因為佢嘅廣告真係一個接一個，基本上一出街都會見到佢嘅存在～

有翻版金城武之稱嘅Louis成面都係鬚，男人味Max！今年25歲嘅Louis真係靚仔得嚟又搞笑，佢IG有好多Chok相但又會配啲膠膠地嘅字句，重點係佢都係貓奴嚟咖！

最值得欣賞嘅係，喺《入住請敲門》入面，Louis完美展現無畏無俱嘅精神，雖然不斷爆粗（睇得出佢好淆底），但係佢勁專業咁走入去猛鬼國宅、停屍間，仲要喺酒店犯哂禁忌（入房唔敲門、半夜讀聖經⋯⋯）。節目組叫佢做乜都照做，所以好多網民都想佢繼續拍第二季！

# 劉俊謙
劉俊謙Terrance就係《瑪嘉烈與大衛系列-前度》嘅男主角，喺香港演藝學院畢業，唔洗講都知係好戲之人！有演技又靚仔嘅男生真係賣少見少，希望佢會再多啲機會發展啦～

叫Terrance做男神絕對冇錯，俊俏嘅臉孔再加上渾身肌肉，會唔會太犯規啦？同Louis一樣，Terrance都只係表面文青，睇佢IG就可以發現佢都係一個充滿幽默感嘅男仔～快啲Follow佢IG啦～

# 楊偲泳
其實喺《矛盾一生》嘅MV入面已經覺得Renci好靚，最近因為魔鬼身材喺網上討論區走紅嘅楊偲泳Renci，笑起上嚟仲要有個甜美酒窩，加上Cute到爆嘅兔仔牙，性感風／可愛風都可以完美駕馭～

喺Viu TV入面佢拍過《SE7EN》，每一集入面都會為主持人實現一啲瘋狂嘅幻想，例如用紙造嘅船載人過海、清理大量海灘垃圾等等。Renci就係因為哩個節目而受到一眾巴打追捧啦～馬甲線＋小蠻腰＋玲瓏浮凸嘅身材喺節目中一覽無違，女神之名真係當之無愧呀！

# 蔡思韵
蔡思韵 Cecillia最近同陳奕迅拍攝《短暫的婚姻》而走紅，清秀空靈感嘅外表＋札實嘅演技實在係真．女神無誤！清純氣質更加令網民大讚佢有白百何＋周冬雨，Cecillia今年只得22歲，但係要喺劇中飾演一個30幾歲嘅媽媽，佢都可以完美消化角色～

Cecillia IG充斥著濃厚嘅文青感，加上清淡細緻嘅妝容同埋以自然簡約為主嘅穿搭，好似滲出陣陣仙氣咁～睇佢啲相剩係覺得氣質哩樣嘢真係扮唔到出嚟！遲啲佢有份參與嘅電影《盜命師》大家記住睇啊～

其實Viu TV嘅節目真係幾好睇，唔知你地最近有冇睇開Viu TV邊套劇集／綜藝呢？

Text Source：Girls Editorial
Photo Source：Instagram、Internet