馬明終於擺脫天然呆！《降魔的》隔世親情線超催淚，細膩演活麻甩的士佬有望問鼎視帝〜

比起大卡司勁宣傳的台慶劇《誇世代》，另一套《降魔的》初頭冇乜人講，而且題材係TVB鮮有的降魔鬼怪，雖然有馬國明同黃智雯坐陣，但同時大膽起用胡鴻鈞、劉佩玥等新人擔大旗，大家開頭都冇乜期望，點知...《降魔的》先係爆冷嘅高質好劇！劇情催淚感人不落俗套，所有演員都演出自然討好，馬國明更係演技大爆發，備受網民力讚！

故事講述的士司機馬季（馬國明飾）一次人有三急係草叢小解，意外喚醒「石精靈」石敢當（胡鴻鈞飾），從此能夠看見靈魂，後來又認識靈異節目主持貝貝娜（劉佩玥飾）並一齊展開尋妖降魔之旅！奇幻鬼怪劇好易會拍到「膠味濃」，而且TVB好少拍依種劇，點知今次畀左個驚喜大家〜

唔少鬼怪精靈嘅故事都有驚喜同「洋蔥」，而啱啱幾集就講到，馬明嘅的士熟客力哥（金剛飾）力嫂（小儀飾），原來係佢親生父母！

力哥力嫂其實已於多年一場大火而葬生火海，但因為記掛住兒子馬明，而一直徘徊人世，不入輪迴，仲三十年黎不停重覆被燒死嘅經過...唔少觀眾睇到都覺得超虐心！親情真係世上最強大嘅力量，可以超越生死界限...

得知原來死去嘅父母其實一直係身邊陪伴自己，更因為擔心、放唔底佢而三十年間重覆幾千次被燒死嘅痛苦，馬明個種絕望無力感、痛恨自己太遲知道嘅悔恨、無力逆天嘅憤怒，都演釋得細膩動人，觀眾的情緒都被帶進去！

最終馬國明係石敢當嘅幫助提點下，終於破除左力哥力嫂嘅死循環，讓佢地可以放心離開，得到解脫！

臨消失前小儀講：「記住，爹哋媽咪永遠愛你，永遠係你身邊，你唔係孤零零一個。」真係超Touching〜相信唔少觀眾都睇到眼濕濕〜

而且金剛和小儀的表現同樣突出，演活一對擔心兒子的平凡父母，觸動不少人的心！

另外，成套劇嘅演員都表演唔錯！飾演「石精靈」嘅胡鴻鈞更係令人眼前一亮，講起文皺皺嘅台詞都自然流暢，「本尊」同馬國明嘅化學作用都好正，同謝雪心嘅母子情亦令人動容！

而且胡鴻鈞兩首插曲都好聽又Match劇情，一響起就令劇情掀起高潮〜

劉佩玥飾演嘅貝貝娜都唔錯，甜美嘅外形本身已經討好，而且今次表演夠放又自然，喊戲笑戲都掌握得唔錯，算係TVB力捧嘅女新人入面演技唔錯嘅〜

而《降魔的》後面嘅劇情同樣吸引，黃智雯飾演嘅醫生莊芷若被撞到靈魂出竅，睇預告更會化身惡魔同馬國明決戰大鬥法，劉佩玥好似都會變成精靈...總之就值得追啦！

Text：Girls editorial

Photo Source：youtube, tvb