女藝人無視禁奶令！台慶女星衣著續個睇，全晚最有睇頭竟然係「阿Bob馬明肉緊咀咀」！

TVB喺台慶舉行前幾日發出內部通知，禁止女星穿著性感出席活動／拍攝節目，不過禁令來得太突然，一眾女星都嚟唔切改衫，唯有著返之前訂落嗰套衫出席啦～

講到成晚最爆嘅就係阿Bob同馬明被迫咀咀嘅一幕！佢地一齊扮演《上海灘》嘅男女主角許文強同馮程程，然後阿Bob仲叫馬明做個天然呆樣出嚟，馬明當然不負眾望，由靚仔Chok樣秒變天然呆樣！

做完之後，企喺二人身後嘅林曉峰突然將兩人嘅頭推埋一齊，瞬間上演肉緊咀咀！見到馬明同阿Bob個樣咁驚嚇，哩幕應該係即場加落去嘅！

之後個鏡頭仲要Zoom去馬明女友黃心穎，心穎BB只好苦笑！

仲有農夫分別扮Do姐同曾志偉已經係全場最好笑嘅一Part！兩人簡直係神複製，C君仲要係咁扮曾志偉把聲講：「打和！」，搞到志偉哥都忍唔住係咁打佢呀！

Do姐都笑得勁開心！

今年因為「限奶令」，令到觀眾都預計會冇乜睇頭～不過亦都有啲女藝人一早已經度身訂造咗禮服改唔切，唯有頂硬上性感出席台慶～

# 邵珮詩
講到最性感嘅第一位女星一定唔少得2014年嘅港姐邵珮詩啦～只得兩條布遮住上身，而且紅地毯嘅時候仲唔小心露埋乳貼，性感程度絕對冠絕尋晚嘅台慶！

# 張秀文
一向以性感見稱嘅張秀文行紅地毯亦都搏到盡，一身「上下齊露」嘅性感造型出場，謀殺眾人視線！

# 蘇韻姿
每晚都係《愛．回家之開心速遞》度見到佢嘅蘇韻姿平時密密實實，估唔到係大堆頭50花旦表演入面突圍而出！只係得一兩個鏡頭嘅佢著起哩件白色紗裙都Show到身材，證明本身都係有料之人呀～

講完性感Show身材嘅女藝人，不如睇下高貴大方嘅微性感女星啦～其實唔洗露太多都好好睇嫁～

# 胡定欣
同陳展鵬只係火火幕情侶嘅胡定欣，雖然陳展鵬已經同單文柔大方認愛，但都局住要同佢撓住手行紅地毯～不過就有少少貌合神離⋯⋯

冇露胸但有露背，做開運動嘅身型真係勁好睇！

# 田蕊妮
不嬲都唔係以性感形象示人嘅田蕊妮係台慶當日都隆重其事，性感之餘又Elegant ～

 '

# 李佳芯＋朱千雪
哩個畫面會唔會太好睇！！！朱千雪同Ali條裙都閃到爆，加埋佢地個靚樣，就好似兩個公主和王子企埋一齊咁～

# 劉佩玥
阿Moon件白色Deep V晚禮服都好性感，將頭髮梳成公主頭，襯返佢一向甜美可愛嘅形象～

# 岑麗香＋劉穎鏇
香香公主尋晚條裙真係成個灰姑娘咁！！Tiffany反而擠咗少少鬼鼠肉出嚟，有少少失分～

# 高海寧
向來性感嘅高海寧今年竟然著得好密實，只係露咗少少腰出嚟，相比起一齊行紅地毯嘅姚子羚，真係焦點盡失呀～

# 姚子羚
哩身霧紫色高貴優雅嘅晚禮服絕對可以入選今晚最靚衣著嘅頭五位！

# 王心穎
心穎BB嘅透視Lace禮服盡顯曲線！估唔到心穎原來都幾Fit呀～

# 王君馨
越來越有魅力嘅太子妃王君馨真係好靚！條裙略嫌累贅唔夠簡潔，但係有靚樣搭夠～

# 何雁詩 ＋ 鄭俊泓
喺星夢大合照入面，何雁詩同鄭俊泓哩對小情侶不避嫌齊齊企影大合照～何雁詩一身低胸露腰開衩禮服簡簡單單之餘亦都襯返佢嘅年紀，揀得唔錯～

# 吳若希
本身已經係童顏嘅Jinny，著起哩條灰藍色繡花透視長裙，完全睇唔出佢已經係媽咪級！哩身打扮充滿少女味，好似仙子咁靚呀～

# 陳自瑤
Yoyo今晚條裙又靚又高貴，透視黑色繡花長裙顯得佢勁後生！不過全晚同老公王浩信都冇乜接觸，如果佢地企埋一齊影合照，應該會係全台慶最賞心悅目嘅畫面呀～

# 呂慧儀
以往嘅台慶都會Show下身材嘅長腳蟹今年都收起性感，小編覺得咁樣輕微露下膊嘅長腳蟹更加有氣質！

網民一致認為今年嘅台慶真係冇乜好睇，有幾Part仲睇到尷尬病發作⋯⋯而且上得大台嘅花旦唔多，仲要連阿姐汪明荃都要搬埋出嚟先叫做有少少睇頭，哩幾年係TVB小生花旦交棒嘅年代，睇嚟要再創高峰都仲要等多幾年啦～

Text Source：Girls Editorial
Photo Source：Weibo、TVB