TVB綠葉大集合！50周年台慶全場最感動畫面，向默默付出的演員致敬，每一位都是不可缺少的最強綠葉！

係啱啱過去嘅禮拜日就係TVB50周年台慶嘅大日子，全台藝人都施展出渾身解數為台慶表演，當中分別以50個當紅小生及花旦嘅熱舞環節陣容最鼎盛，咁多人真係睇到頭都暈埋(笑)～其他表演環節就不乏年年都有嘅搞Gag表演、抽獎環節同埋切蛋糕，真係照辦煮碗年年一樣！不過成個台慶都有一個亮點位，同時亦係最令人感動嘅畫面，就係特別安排咗一個環節向咁多位綠葉演員致敬，邀請佢地分享感受，呢part真係超抵讚！

咁多個電視劇迷相信由細到大都睇過唔少電視劇，除咗劇中嘅男女主角之外，總有幾個熟口熟面嘅演員成日出現係大家面前，有時真係叫唔出佢個名都一定認得佢個樣，以下呢9個有份係台慶上分享感言嘅綠葉演員，相信每一個都係大家心目中嘅最強綠葉！

#01 御用祕書 - 何綺雲

幾乎每一套有辦公室情節嘅電視劇都一定見到佢嘅出現，佢就係人稱宇宙最強祕書嘅何綺雲！原來佢係不經不覺之間已經係TVB做咗14年，現實生活中雖然性格低調，但係電視劇入面依舊係一個大家唔會忽視嘅存在，特別係《愛．回家》中飾演嘅祕書Maggie，形象真係超入屋！

#02 御用跟班 - 楊證樺

係1996年加入TVB嘅楊證樺曾經飾演過大大小小嘅角色，係之前引起熱話嘅《同盟》一劇中飾演姚子羚嘅大哥，其中一幕為細妹擋一巴嘅戲份就連監製都特別點名稱讚做得好man！而係台慶當晚佢亦有以下感言：「一粒螺絲可以成就巨輪，呢個就係我楊證樺嘅堅持！」無論戲裏戲外都係一個有擔當嘅好男人～

#03 御用街坊 - 蘇恩磁

係電視劇中經常扮演街坊或者師奶嘅蘇恩磁絕對係陪伴住大家成長嘅甘草演員，佢表示即使係街上面無人叫得出佢個名，但亦都有人會同佢講成日係電視上面見到佢，對佢嚟講就已經係最大滿足！

#04 御用傻仔 - 戴耀明

憑住《鐡馬尋橋》入面排長一角，長期飾演傻仔嘅戴耀明終於發圍彈起，成功改變戲路，先後做過《巾幗梟雄之義海豪情》嘅日本皇軍向山達也，近年亦返內地拍劇更榮升男一，多年嚟嘅辛苦終於有回報，絕對值得慶賀～ 不過即使係咁，佢仍然對於可以係TVB拍劇覺得好滿足，亦表示無論果個角色係咪男一，亦都會將佢變成唯一！

(不過當晚一時口誤將唯一講錯咗女一，認真搞笑XD)

#05 御用奸人 - 鄭子誠

鄭子誠所做過嘅奸人角色真係深入民心，當中包括《封神榜》嘅紂王、《同盟》嘅柳議員、《超時空男臣》嘅張誠等，真係數之不盡～每次睇佢做戲都會覺得佢真係由內奸到外，超好戲！有網民更加表示每次佢做親嘅角色背後都一定有大陰謀，睇嚟大家都入戲太深～(笑）

#06 御用闊太／後母 - 韓馬利

入行超過40年嘅韓馬利每次做戲都超入形入格，真係做咩似咩，佢做得最多嘅角色就係闊太同埋人地嘅後母，係《同盟》入面飾演鮑起靜嘅家姐令熹，巴渣、鐘意搬弄是非嘅形象真係做得超黑人憎，令呢套劇生色不少！

#07 御用金庸角色 - 秦煌

TVB資深演員秦煌原來係唔少金庸劇集入面出演過，包括《射鵰英雄傳》、《神鵰俠侶》、《倚天屠龍記》等等，堪稱係御用金庸角色，每次係電視入面見到佢嘅身影，都會覺得好有親切感～

#08 胡楓

人稱「修哥」嘅胡楓絕對係香港人心目中嘅活寶貝，即使已經年屆85歲依然老當益壯，經常都會帶俾大家歡樂，直到依家仍然堅持出演電視劇，就好似啱啱播完嘅《老表，畢業喇！》同埋拍攝緊嘅《再創世紀》都有佢份，果然係活到老，做到老！

#09 羅蘭

而我地嘅羅蘭姐同修哥一樣亦都係香港人不可缺少嘅好演員，佢唔單只拍攝電視劇，亦有出演電影，更加憑住出色嘅演技獲得過香港電影金像獎影后嘅殊榮，近年佢更加插足廣告界，成為大家心目中經典嘅萬聖節女鬼代表！

除咗上述9位綠葉演員之外，當晚有份參與表演嘅仲有近年成功彈起嘅3位最強綠葉，包括一日死5次嘅羅樂林、打不死嘅歐瑞偉同埋金句王劉江，每一個都有出色嘅代表作，為香港人帶嚟唔少樂趣同深刻嘅回憶～

呢班綠葉演員雖然戲份唔多，但一套電視劇入面無咗佢地嘅參與，就好似缺少咗靈魂一樣，正如盛開嘅玫瑰無咗綠葉嘅襯托亦會失色不少～希望TVB能夠對呢班綠葉演員更加好，改善一下佢地嘅代遇，而觀眾亦都可以更加認識呢班係背後默默付出嘅演員～

Text: Girls editorial

Photo Source：tvb, youtube