君子分手不出惡言！張繼聰遭無綫封殺仍感謝大台栽培，粉絲：「冇左你就終於可以罷睇TVB！」

張繼聰近年喺無綫發展得好好，連台慶重頭劇集都會預埋佢一份，戲份仲要唔少添！不過大家可能有一排會喺電視度見唔到張繼聰啦（嗚嗚⋯⋯）

有張繼聰份嘅電視劇口埤都幾好，之前有份拍攝嘅《老表你好嘢》、《忠奸人》、《幕後玩家》都有唔錯嘅收視，都算係福將之一！即使唔係無綫簽約男藝員，喺《收規華》入面都擔正做男一～

不過近日無綫50週年台慶都見唔到張繼聰嘅身影，有報導指，張繼聰受到老闆蕭定一同無綫嘅官司所累，令佢有一段時間都唔會出現喺TVB啦！

事緣係蕭定一公司喺2014年同佘詩曼簽約拍電影《十月初五的月光》，合約寫明18個工作天拍攝，收取190萬片酬。如果要額外工作，就收日薪11萬～當時仍然係佘詩曼經理人嘅無綫上年就入稟追討93萬5千，官司到而家都仲未完結。但係上月起就開始向佢旗下藝人開刀，連欣宜、Babyjohn等人都受到影響！

張繼聰睇到報導後，尋晚喺IG Post咗段片回應事件，表示：「大家好，咁今日出咗單新聞之後，好多謝大家嘅支持啦～咁嚟緊有一段時間唔可以再喺將軍澳出現啦！有啲說話都係好想係度交代嘅，首先喺過去嘅日子好感謝TVB對我嘅栽培，俾咗好多機會我啦，好多謝珍姐啦，好多台前幕後嘅兄弟姊妹呢，好多謝你地俾咗好多好美好嘅回憶我！將來嘅日子我會繼續努力，係我嘅作品入面，俾心機磨煉自己嘅演技！至於現在啦，梗係要「誇～一切要誇」，希望大家會繼續支持《誇世代》啦，我都好Enjoy睇每一集嘅！喺生活裡面呢，我覺得最緊要係隨遇而安，我會繼續努力咖，Thankyou！」

A post shared by 張繼聰 Louis (@louischeung2013) on Nov 22, 2017 at 3:37am PST

其實張繼聰真係好無辜，因為佢今年8月先同蕭定一簽約，點知幾個月後就因為一單唔關佢事嘅官司而被封殺！連近日熱播嘅《誇世代》都唔可以出席宣傳活動⋯⋯即使俾無綫封殺，都仲呼籲Fans繼續追睇，真係好有氣量！！

非常有觀眾緣嘅張繼聰當然亦有一班網民支持佢，紛紛喺佢IG留言，有海外Fans話係因為張繼聰先會睇TVB、本地Fans就話「無左你就終於可以罷睇tvb luuu!! 」，仲話TVB係放虎歸山等等～

希望可以快啲喺唔同嘅平台見到張繼聰啦～

Text Source：Girls Editorial

Photo Source：Weibo、IG