留伏筆拍續集？《降魔的》大結局最慘一定係小馬，網民：哩套係最好睇嘅台慶劇～

《降魔的》係TVB台慶劇入面最少集數嘅劇集，不過比起超豪華陣容嘅《誇世代》，《降魔的》嘅口碑絕對贏哂！尋晚播出嘅大結局令好多網民都覺得有伏線，希望TVB會拍續集～

大結局一開始已經有催淚位，小編覺得全套劇入面最痴情嘅角色一定係由劉佩玥飾演嘅啤啤當選！在世時已經幫小馬追芷若、因為小馬而死，到死後明明可以留喺夢入面有幸福嘅生活，但佢都知道喺哩個幻境入面嘅幸福係假既！出返嚟同小馬傾夢想嗰陣，兩人淚流滿臉真係覺得啤啤勁慘！！

之後小馬就下定決心要為啤啤＋有為報仇！

同郭展明喺魔創造嘅異空間入面決鬥，幾吓手勢就將郭展明打至重傷，仲被魔誘惑到，用槍將郭展明殺死！

然後扮向魔投誠，用石敢當嘅本體（嗰舊水晶）造嘅子彈消滅魔～

因為殺咗郭展明，始終都係有罪孽喺身，令佢疏遠芷若、唔夠膽同芷若一齊～當小馬叫芷若做「莊醫生」嘅時候，真係有種心痛嘅感覺！

網民就話，最套劇最慘就係小馬！不但死哂親朋好友，仲要背負著石敢當降魔伏妖嘅責任生存，又因為自己嘅經歷害死身邊人，所以唔想同芷若拍拖～

網民睇完大結局後都覺得《降魔的》有機會拍續集，因為哩套劇係講鬼，所以即使啤啤、有為或者其他角色死咗都仲可以繼續講落去～而且網民覺得大結局入面都留低咗唔少伏線！

首先就係同郭展明有一手嘅佩玲，懷有郭展明骨肉嘅佢去醫院產檢，同芷若對話完之後，雙眼發出魔嘅紅光！相信佩玲肚入面嘅BB就係魔嘅轉世，所以一定會有下集咁話～

小馬喺馬路中間大叫「石敢當」三次，希望石敢當會出返嚟～上車後發現胡鴻鈞上咗車，小馬問「石敢當？你返咗嚟啦？」，胡鴻鈞就話：「你唔記得咗我啦？」，然後小馬充滿疑問地講咗句「豪仔？」就完咗大結局啦！

因為石敢當平時稱呼自己做「本尊」，而唔係「我」，所以網民都覺得哩個係豪仔而唔係石敢當～不過豪仔衣著打扮＋表情都同魔嘅打扮一樣（展明＋魔都係著黑色衫），會唔會係為咗細個比小馬害死一事返嚟報仇？哩個亦都係網民覺得會開拍續集嘅原因之一！

《降魔的》其實開播嘅時候都未受到網民追捧，而係10幾集嘅時候發覺哩套劇埋藏咗好多伏線，再加上戲中一眾配角（例如：些粉、龍貓）演技出色，先令到哩套劇成為年度之作～

不過好多網民都話，TVB唔識見好就收，好多時拍續集就會拍到爛哂！你地又想唔想《降魔的》拍續集呢？

Text Source：Girls Editorial
Photo Source：TVB