陳柏宇為演唱會苦練舞步！開騷在即緊張到失眠，老婆Sweet爆煲愛心靚湯補身打氣〜

陳柏宇（Jason）將於本週末（12月2及3日）首度於紅館舉行個唱《陳柏宇SPEECHLESS演唱會2017》，相信各位Fans都好期待！而Jason今次除了會獻唱多首新舊作品外，更特別為演唱會苦練舞步，兩個多月的緊密綵排，都只是想給予觀眾最精彩的表演！

Jason指今個舉行個唱的最大難度，在於要記歌詞及舞步，他說：「因為會喺騷上唱新歌，又要跳舞，當兩者要喺同一時間發生，加上喺騷上又會彈結他，自己喺呢啲好少有機會演出、但一演出就喺演唱會上表演嘅嘢，壓力其實都幾大。」Jason更說自己只要一有時間就會練習，有時在家都會練，最少練習了兩個月！

而Jason更說因個唱臨近而緊張到失眠：「因為一合埋眼，就會諗歌詞、舞步同要講啲咩，心情緊張係有嘅，但我盡量都會放鬆心情。」而且更因操fit身形而受傷：「因為操練而受傷就有，又可能因為壓力關係，條頸成日扯住咁。」

家人當然都為Jason緊張起來，幸得外婆及太太符曉薇（Leanne）有煲愛心靚湯給他補補身：「婆婆同我老婆都有煲湯俾我飲，大家好緊張我營養夠唔夠、精神好唔好咁，所以我唔想太緊張，因為佢哋會同我一齊緊張，我想大家都輕鬆啲。」

最後，Jason最希望自己可以帶個開心溫馨的演唱會給觀眾，他說：「希望我可以令大家輕鬆啲、帶到啲娛樂俾大家，我不嬲都想推廣生活得開心溫馨，希望觀眾睇完我個show之後，可以喺生活上有新睇法。」

Jason真的為演唱會「博到盡」，至於會否在台上脫衣晒肌，Jason謂不會為脫而脫，到適當時機可能會晒一下，但說不定，又可能會穿短褲代替！大家就密切期待一下吧〜

Text：Girls editorial

Photo Source：SonyMusic , instagram