《降魔的》劉佩玥連提名都冇！TVB《萬千星輝頒獎禮》公佈提名名單，網民怒轟TVB漠視民意！

TVB嘅《萬千星輝頒獎禮》向來都係全城焦點所在，一眾藝人傾盡心思咁拍攝，無非都係想得到觀眾嘅認同～TVB尋日公佈咗《萬千星輝頒獎禮》4個獎項嘅提名名單，唔少網民都覺得哩份名單漠視民意！

作為50週年台慶劇嘅《溏心風暴3》一如所料得到多項提名，一套劇集入面竟然有4個女主角提名！老戲骨＋專登返嚟拍劇，點都有份入圍嘅有：關菊英、李司棋、米雪～睇怕視后之位都係佢地三個之爭啦！

令網民大跌眼鏡嘅係香香公主岑麗香都憑著《溏心風暴3》提名最佳女主角！不過小編認為《溏心風暴3》只係播出咗一排，大家都未睇到佢劇中嘅表現，都唔可以下定論住～

同劇入圍最佳男主角嘅當然有夏雨同埋黃宗澤啦～（王浩信另外憑《踩過界》入圍最佳男主角）

不過《溏心風暴3》自開播以黎嘅收視都冇話好好，而且觀眾對《溏心風暴3》嘅評價都係麻麻地⋯⋯TVB今次比咁多演員入圍，難怪網民都會質疑哩套劇究竟值唔值！

前排好Hit嘅《降魔的》只係贏咗觀眾嘅口碑，兩大獎項入面只得馬國明獲提名最佳男主角！

表現出色兼有進步嘅啤啤劉佩玥連最佳女配角提名都冇，實在令小編都覺得好可惜呀～阿Moon嘅演技雖然未算好好，但喺劇入面飾演女兵嘅角色入形入格，喊戲夠自然，希望下年再接多啲電視劇，爭取入圍啦！

最佳男女主角其實都唔夠男女配角競爭激烈，事關好多贏盡口碑嘅男女配角都入圍！包括：《不懂撒嬌的女人》嘅游生袁文傑～

《同盟》嘅易先生歐瑞偉！

《降魔的》入面嘅4位配角：蔣志光、何遠東、黃子恆、胡鴻鈞都有份！！！

當中《降魔的》嘅龍貓何遠東入圍，好多藝人都替佢感到高興，睇好佢會拎男配角！網民對於佢嘅入圍都感到滿意～

而且佢係坊間嘅口碑都唔錯，相信今年最佳男配角都可以穩陣入袋啦～

女配角方面，《不懂撒嬌的女人》高Ling、《踩過界》嘅朱千雪、《同盟》姚子羚、《降魔的》謝雪心都係民間呼聲最高嘅～

2017年《萬千星輝頒獎禮》將會係2018年1月21號舉行，今次又會玩全民投票，想自己鐘意嘅藝員攞獎，到時就記住要投票啦～

Text Source：Girls Editorial
Photo Source：TVB、Instagram、Weibo