TVB又一小鮮肉！前港隊泳將余德丞，42吋胸肌＋治癒陽光笑容仲係高富帥「筍盤」〜

大家有冇追TVB台慶劇《誇世代》呢？差唔多雲集大台人氣小生花旦的大堆頭製作，除了多個熟悉的臉孔，觀眾都留意到一個亮眼的新人，佢就係劇中飾演尚通銀行小職員「死窮鬼」Ocean的余德丞！除了討好嘅外形，原來佢仲係名副其實嘅高富帥超「筍盤」〜

28歲嘅余德丞（Dickson），淨係睇外形已經超亮眼，如韓國Oppa般細細的單眼皮眼睛，加上可愛又陽光嘅笑容，笑起上黎真係治癒度滿分，超Charm呀〜〜

Dickson畢業於香港華仁書院，後來2011年係香港城市大學工商管理學系畢業，而且佢仲係前香港游泳代表隊成員！練得一身42吋胸肌Fit爆身材，唔係個種超誇張嘅爆肌，恰到好處嘅健碩身材，真係會令女生尖叫！平日更勤力游水、踢波、做Gym完全係個運動型陽光男孩〜

2013年加入無綫電視嘅余德丞因熟體育事宜，早前就去過巴西為無綫擔任「里約奧運會」外景主持，亦去過台灣主持「世界大學生運動會」！之前都係多數擔任兒童節目主持如《Think Big 天地》、《Think Big 遊學團》等〜

劇集方面，曾經客串過《殭》同《幕後玩家》，直到今次《誇世代》先正式擔任男配角，做江美儀同關禮傑嘅仔仔Ocean，仲同陳嘉寶及麥明詩有感情線添！

而首次表現已經非常亮眼，雖然演技有待進步，但難得有高顏值嘅新面孔，係TVB簡直如同清泉令人眼前一亮！

劇中當然不乏騷肌場面，大曬42吋胸肌好身材，加上帶點青澀嘅溫柔笑容，真係養眼度爆燈！好想睇多D佢嘅戲份〜〜

無論側臉正臉七分臉都咁靚仔，加上高挑俊朗嘅身形，可以話係360度無死角靚仔一名！

而且Dickson更係正牌「高富帥」，出身富貴家庭嘅佢，同父母住係跑馬地嘉園嘅二千萬豪宅，同天王郭富城係鄰居！仲同父母聯名擁有多個總市值逾半億嘅豪宅單位，有樣有身材有家底絕對係「筍盤」！

另一方面，Dickson更有新一代「港姐殺手」嘅稱號！因為合演《誇世代》而同港姐冠軍麥明詩傳出緋聞，更被影到過同麥明詩Share食一杯雪糕，不過麥明詩就澄清兩人為普通朋友關係〜

後來同港姐亞軍劉穎鏇一齊去台灣主持「世界大學生運動會，又傳出Dickson力追劉穎鏇，一齊去台北周圍玩，又幫女方拍踏單車片咁話〜唔通兩個都鍾意運動所以特別啱傾？

Anyway〜都好期待Dickson有多D參演嘅機會，可能有望被力捧做新一代小生？

Text：Girls editorial

Photo Source：TVB，Instagram