點解唐文龍咁鍾意同回收箱合照？神秘「L」手勢內含玄機，唐文龍堅係有樣有內涵真男神！

大家有冇追TVB台慶劇《溏心風暴3》呢？劇中一大亮點，絕對係久違11年重返TVB拍劇嘅48歲型男唐文龍！今次破格挑戰渣男角色，同陳敏之飾演的黃以愛有段不倫之戀，激情床戲真係睇到人嘩一聲！

雖然係演奸角，但都無損唐文龍Man爆嘅魅力，唔少網民都話以前佢做《十月初五的月光》嘅金勝、《人生馬戲團》嘅阿星已經好鍾意佢，而且越來越有男人成熟魅力，加上一身爆肌健美身材，真係好正呀！

但近日，唔少人都發現唐文龍微博上經常上戴同環保回收箱的合照，仲必舉一個神秘「L」手勢，到底係有咩玄機？

真係影勻世界各地嘅回收箱，去到邊見到都要停低打卡，唔同Pose都有齊曬〜唔通男神對回收箱情有獨鍾，有同回收箱合照嘅愛好？？

原來〜唐文龍私底下係一名熱愛環保嘅人士，經常出post發文呼籲大家支持環保，而同回收箱合影，都係想呼籲大家要珍惜資源、愛護地球、為環保出一分力！

每次同回收箱合影都會用心寫一段文字呼籲大家支持環保，分類回收令環境生態得以持續發展，配上咁型嘅合照，以後每次經過回收箱都會諗起唐文龍嘅呼籲啦！

至於迷之「L」型手勢，其實係想做垃圾分類回收的三角標誌，不過通常一手搾機自拍，就淨係可以用另一隻手做「角」，而且睇睇下依個手勢都幾型幾正呀！

連拍緊《溏心風暴3》嘅戲份，空餘時都不忘影張相舉舉手勢宣揚環保！睇住昌旺集團CEO Nic叫你支持回收再造，畫面都幾喜感（笑）〜

其實唐文龍的微博除咗環保議題，亦不時分享愛護動物等資訊，呼籲大家不要棄養，善待流浪動物等，愛護環境又有愛心，真男神無誤！

更不時寫一些具有人生哲理、充滿正能量的句子，又會偶然有感而發，盡顯唐文龍樂觀豁達、感性浪漫的一面！睇佢嘅微博真係會令人有所感悟，獲益良多！有內涵修養嘅男人永遠係最Charm〜

唐文龍本身亦於紐約著名時尚學府Fashion Institute of Technology 攻讀服裝設計學士 ，48歲身形依然Fit爆Keep得好好，男人味更加出曬黎〜有樣有身材有內涵仲有演技，絕對稱得上係完美男神一名，值得更多人留意同支持！希望今次唐文龍回歸香港電視圈，能再創事業高峰啦〜

Text：Girls editorial

Photo Source：Weibo，TVB