相隔16年再參加頒獎禮！謝霆鋒驚喜現身激情演唱《活著VIVA》，網民：「謝霆鋒演唱會幾貴都要去睇！」

講到每年最期待嘅頒獎禮，一定非叱咤莫屬！今年比起邊個邊個拎女歌手金獎、男歌手金獎，最令觀眾感到驚喜嘅一定係謝霆鋒驚喜現身，高唱多首金曲，喚起大家童年回憶！

一開場首先由Supper Moment同觸執毛一齊喺台上表演，本來大家都以為用Band Show炒熱氣氛，點知彈到《玉蝴蝶》嘅前奏時就傳來謝霆鋒嘅歌聲！

因為事前完全唔知謝霆鋒會出現，所以令到大家都覺得超級驚喜～

然後同Supper Moment＋觸執毛一齊合唱新歌《有火》，哩隻歌仲係謝霆鋒2018年回歸樂壇第一擊！

歌詞亦都好有意思「要告別理想怎算活過 世界沒理想怎去高歌 最漂亮固執 忠於那當初 即使發夢錯 但那是最好的錯」，勉勵大家要勇敢追夢！

雖然只係穿著黑色上衣配牛仔褲，但係佢一拎起結他嗰陣型佬味完全散發哂出嚟！

最後拎起枝結他唱《活著VIVA》，因為有樂器未準備好，謝霆鋒出聲：「唔好意思呀，Live呀～」力證哩個絕對唔係錄定／假唱！

謝霆鋒表演《活著VIVA》成功令全場觀眾High起來，引發全場哄動！

見到現場個個觀眾＋歌手都舉高雙手跳躍，完全係全晚最興奮嘅一刻！

哩段表演真係聽到小編雞皮都起埋，簡直就係80、90後嘅童年回憶，係青春呀！

謝霆鋒之前亦都預告，2018年會將會重拾結他做返歌手，將重心放返喺音樂上面～一班網民都話好支持：「如果謝霆鋒開演唱會幾貴都要睇」、「唱歌好過煮餸啦」！

陳奕迅同樣驚喜現身唱多首經典金曲，最正嘅係配合林海峰感性又深情嘅獨白，令到大家都大呼感動～

林海峰一邊以磁性嘅聲音道出30年叱咤重要時刻，螢幕一邊播放30年以來嘅經典畫面，啲回憶真係返哂嚟呀！整個表演就好似做緊廣播劇咁，真係超正～

今年《2017叱咤頒獎典禮》有謝霆鋒打頭陣、陳奕迅做壓軸，加上「為明日回憶」哩個主題，絕對係近年最正嘅表演呀！

Text Source：Girls Editorial
Photo Source：商業電台、ViuTV