套套妳都一定睇過！盤點TVB近10年「最佳劇集」，今年「最佳劇集」你又支持邊套？

仲記得以前細個一定會電視機送飯，每一套電視劇都會追睇，頒獎禮都會追得勁貼，希望自己鐘意嘅劇集、男女主角得到獎項～今年TVB嘅頒獎禮因為台慶劇仲未播完嘅關係，改為嚟緊嘅1月21號舉行！而家等小編同大家盤點TVB嘅最佳劇集，勾起大家嘅童年回憶啦！

# 2007年 - 《溏心風暴》

《溏心風暴》絕對係現代爭產劇嘅始祖！無論係背景音樂定係角色設定，喺當年都成為網民討論熱話～《溏心風暴》更加係2007年最高收視嘅劇集，結局週嘅收視更加高達48點，贏盡觀眾口埤～

入面大契（李司棋飾）金句：「呢度唔係法庭，唔需要證據，我對眼就係證據」、「邊個係人，邊個係鬼，我睇得出」，至今仲係網民成日拎出嚟講嘅對白～

關菊英所唱嘅主題曲《講不出聲》當年都勁Hit，連周杰倫都有翻唱過呀～

# 2008年 - 《溏心風暴之家好月圓》

因為《溏心風暴》實在太收得，第二年TVB火速推出《溏心風暴之家好月圓》！唔講大家都未必知，《溏心風暴之家好月圓》原來係史上最高收視50點嘅電視劇之一！平均收視更高達47點，是2008年最高收視劇集～

今集同樣由關菊英唱出主題曲《無心害你》，十大勁歌金曲頒獎典禮上面拎咗「傑出表現金獎」，更加引申出關心妍蝦碌拎錯獎事件～

# 2009年 - 《巾幗梟雄》

當年柴九（黎耀祥飾）金句：「人生有幾多個十年？最緊要活得痛快」成為港人最鐘意講嘅金句！呢套劇仲要贏咗「最佳男主角」、「最佳女主角」、「最佳女配角」、「我最喜愛的電視男角色」、「最佳劇集」同埋「飛躍進步男藝人獎」～

# 2010年 - 《公主嫁到》

《公主嫁到》入面佘詩曼同陳豪互動非常盞鬼搞笑，仲記得佢地成日都會押哂韻係度打油詩，真係睇到觀眾津津樂道！大家仲記唔記得「金家精神，團結過人」，然後一眾演員係度拍手嘅片段呢？

# 2011年  - 《潛行狙擊》

講套劇名大家未必記得係邊套，但係講起Laughing Gor同跛Co大家一定記得！《潛行狙擊》係《學警狙擊》續集，不過《潛行狙擊》喺頒獎禮嘅成績其實一般，亦都有網民話點解唔係《怒火街頭》、《點解阿Sir係阿Sir》、《魚躍在花見》拎最佳劇集～

# 2012年 - 《天與地》

「家明！點解要食咗家明！」《天與地》涉及搖滾、人性、政治同宗教等議題，當中人食人話題惹起爭議，另外又因為有講到政治題材，成為第一部被廣電總局禁播嘅華語電視劇！

呢度被網民稱為神劇嘅《天與地》，內含大量政治隱喻，引起年輕人嘅共嗚！

「This city is dying」、「和諧不是一百個人講同一說話，和諧是一百個人有一百句不同說話之餘，又互相尊重」等金句，都成為年輕人成日掛在嘴邊嘅說話～

# 2013年 - 《衝上雲霄II》

仲記得細個睇完《衝上雲霄》勁想做空姐！《衝上雲霄II》繼續成為收視保證，更加係2013年唯一一套突破40點收視嘅劇集～

Captain Cool真係好型呀！！

不過當年「最佳男女主角」對手超強勁，男主角方面由黃子華拎、女主角就由田蕊妮得到～

# 2014年 - 《使徒行者》

佘詩曼飾演嘅釘姐大獲好評，一口氣拎咗勁多個視后獎項！更加係播放量最高嘅港劇，甚至遠遠超越《衝上雲霄II》～呢套劇更加比觀眾選擇遺憾／圓滿結局，最後圓滿版嘅大結局大比數領先，所以最後都係播圓滿版～

# 2015年 - 《梟雄》

有好戲之人黃秋生&湯鎮業加持，網民更加大讚黃秋生「連背影都有戲」，黃秋生係劇入面仲要大講上海話，大家都大讚佢敬業樂業！

# 2016年 - 《城寨英雄》

以香港50年代城寨為材嘅《城寨英雄》令大家都非常有親切感，而且劇情搞笑又緊湊～《城寨英雄》更加係上年嘅大贏家，一次過找哂「最佳劇集」、「最佳男主角」、「最佳女主角」、「最受歡迎電視男角色」、「最受歡迎電視女角色」、「飛躍進步男藝員」及「最受歡迎劇集歌曲」！

今年大家又睇好邊套劇集拎「最佳劇集」呢？《降魔的》／《不懂撒嬌的女人》／《踩過界》定係《同盟》呢？

Text ：Girls Editorial、Internet
Photo Source：Internet