大台頒獎禮爆大冷！盤點萬千星輝頒獎典禮6大爭議獎項，網民：「今晚真係冷過雪櫃！」

無綫電視嘅萬千星輝頒獎典禮已經完滿結束，對於頒獎禮嘅結果有人滿意亦有人鬧爆，而家就等小編同大家一齊盤點最多網民爭議嘅獎項！

# 飛躍進步女藝員

哩個獎有朱晨麗、高海寧、麥美恩、譚凱琪、湯洛雯同埋黃心穎角逐，最後由麥美恩成功得到獎項！觀眾都好欣賞麥美恩嘅主持功力＋麻甩搞笑嘅性格，而且佢嘅得獎感言好感人，聽到小編都眼濕濕～

不過有網民就話麥美恩做節目主持比較多，如果頒個「最佳節目主持」比佢會啱啲！網民表示「一個冇拍過戲嘅藝人拎飛躍進步女藝員，原來口才都需要演技？」

# 最佳男配角

陳山聰憑著《同盟》獲得最佳男配角，其實哩個獎仲有另外兩個呼聲極高嘅藝員參與競逐：歐瑞偉＋何遠東！歐瑞偉憑《同盟》「易先生」一角深入民心，仲被網民大讚係「港版007」；何遠東喺《降魔的》入面飾演「龍貓」，演技大爆發！

對於哩兩位大熱都拎唔到「最佳男配角」，網民都對哩個賽果表示失望！其實陳山聰拎「最佳男配角」都唔算爆冷，因為佢一早喺《TVB馬來西亞星光薈萃頒獎典禮》拎咗《最喜愛男配角》～

不過網民仍然對於佢嘅前事耿耿於懷，早年為咗追何超雲而同前妻離婚，分手後更被外界稱為「世紀賤男」！

# 最佳女配角

哩個獎項絕對係爆大冷！雖然大家都知道TVB喺2018年將會力捧朱晨麗，但大家都以為只會俾個「飛躍進步女藝員」佢～而且網上大熱、備受網民以至TVB員工支持嘅林淑敏（大小姐）竟然失落獎項，自然令到網民嬲嬲豬！

大家一致睇好＋贏咗「民選最佳女配角」嘅林淑敏失落獎項，令到網民都戥佢唔抵～其實TVB捧朱晨麗捧得咁出面，對於朱晨麗嘅人氣＋觀眾緣嚟講絕對唔係好事⋯

# 最受歡迎女角色

蔡思貝憑《踩過界》入面「癲姐」一角得到獎項，反而賽前大熱＋喺《星和無綫電視大獎》拎咗視后嘅李佳芯就失落獎項，加上宣萱竟然入唔到五強，令網民大跌眼鏡！

好多網民都唔明點解蔡思貝會拎到「最受歡迎女角色」，仲話：「TVB夾硬捧蔡思貝只會令觀眾覺得佢係第二個黃翠如」，加上佢嘅得獎感言令到好多網民都話「唔夠大體」～

# 最佳女主角

事前宣萱已經高調講明唔嚟，大家都知道係唐詩詠＋李佳芯之爭！唐詩詠拎咗獎之後小編都好替佢高興，但一眾網民就唔係咁睇啦！網民表示：「《不懂撒嬌的女人》明明只得一個女主角，如果俾最佳女配角俾唐詩詠就實至名歸」

首度封后嘅Natalie俾網民話佢冇女主角樣，角色亦都局限喺可憐悲慘嘅設定上，好難會有突破～

# 最佳劇集

大熱劇集《降魔的》已經分到一個豬肉獎「全球網民最喜愛劇集」，獲得超多網民支持！但係哩個獎最後俾咗《誇世代》，賽果甚至令陳豪＋田蕊妮都即時O嘴！

要拎最佳劇集，一係就收視極高，一係就口埤極佳。但係《誇世代》收視又唔夠《同盟》爭，口埤又唔夠《降魔的》勁，拎最佳劇集真係有少少講唔通～

對於哩啲爆冷爭議獎項，你地又點睇呢？小編覺得大小姐＋龍貓失落獎項真係好失望呀T^T

Text ：Girls Editorial

Photo Source：TVB