《愛回家》譜迷離三角戀？安仔Bonnie甜蜜但多阻滯，網民：明明朱凌凌先係真愛！

相信唔人都有睇《愛．回家之開心速遞》，劇情輕鬆吸引，仲出咗唔少深入民心嘅角色，好似大小姐、KC、Terry等等，而一班年輕人嘅感情線都非常有睇頭！最近金城安（周嘉洛飾）與Bonnie（林凱恩飾）成為情侶後就Keep住放閃，但依Pair小情侶就有唔少阻滯，而且之前朱凌凌更揚言要拆散佢地（？）依段疑似三角關係真係好正好好睇〜（笑）

安仔同Bonnie以前係死對頭，安仔明明之前仲暗戀梗女神Venus，而Bonnie仲要係死黨朱凌凌嘅前女友，佢地關係真係有D複雜，所以安仔同Bonnie最尾竟然一齊真係令唔少觀眾驚訝〜

Bonnie身為大學單身女子會Bonnie Club的會長，當然唔可以畀人知道佢拍拖，所以就要同安仔玩地下情，搞到拍拖要偷偷摸摸，東避西躲，之前幫Bonnie收衫，仲要畀女子會成員誤會係變態！所以安仔拍拖都拍得幾委屈，但依對Bonnie超級情深，完全係廿四孝男友〜

而安仔之前為咗隱瞞朱凌凌佢同Bonnie 嘅戀情，搞到朱凌凌誤會Venus（鄺潔楹飾）係佢女朋友，仲以為安仔畀人呃走去同佢出氣！後來知道真相，朱凌凌冇嬲安仔同自己嘅Ex一齊，反而覺得Bonnie對安仔唔好，上演一場朱凌凌大戰Bonnie大賽：

朱凌凌：「你對安仔唔好我唔會放過你！」
Bonnie：「唔通你拆散我地呀？」

依種好兄弟邊度搵呀？！通常兄弟同你Ex一齊，點都會影響兄弟情，但朱凌凌竟然係「懟」自己前女友，完全係想同Bonnie搶安仔嘅即視感！難怪網民都話：「其實朱凌凌對安仔先係真愛！」、「不如朱凌凌同安仔一齊啦〜」

最近個集，安仔以為Bonnie想送貴價波鞋畀自己，就努力做兼職買手錶回禮，點知Bonnie只係送佢一對$199嘅波鞋，安仔梗係非常失望啦，但對住女朋友始終強顏歡笑...

後來大家姐熊尚善對安仔實行經濟封鎖，安仔冇錢拍拖連特技人都做埋，朱凌凌睇唔過眼又搵Bonnie理論，話佢知安仔為佢付出咗幾多！只能講...朱凌凌真係好兄弟呀！

不過〜後尾Bonnie都超主動咁錫咗安仔一啖，個種粉紅泡泡真係睇到人心動加速，安仔對Bonnie真係自帶粉紅濾鏡，愛到難離難捨呀〜〜

但朱凌凌對安仔都好好呀〜其實朱凌凌Ｘ安仔，BonnieＸVenus都幾襯呀〜（笑）我地都係繼續追劇，留意劇情發展啦！

Text：Girls editorial

Photo Source：TVB，Instagram