「豪俾你啦」冧到爆！送水輝大小姐今集甜到糖尿，群姐完美助攻，送水輝確認大小姐心意！

送水輝同大小姐嘅愛情線絕對係觀眾最愛收睇嘅情節，雖然一開始送水輝只係將大小姐當作客人看待，之後日久生情，漸漸發現原來大小姐都有好多值得欣賞嘅一面～噚晚播出嘅《愛回家之開心速遞》「初戀無限Loop」入面，再次突顯送水輝對大小姐肯定有意思，究竟兩人幾時先肯喺埋一齊呀？

噚晚播出嘅「初戀無限Loop」一開始就上演送水輝同大小姐嘅床戲！以為只係大小姐FF？又唔錯得哂，其實係大小姐又幫襯送水輝嘅「初戀無限Feel」其中一篇～

大小姐遞張咭俾送水輝嘅時候發覺只係得返5個空格，即係代表「龍小蓮」同「牛頭角輝Dee」嘅故事好快就要叫停！

大小姐因為怕星期六冇得再用「龍小蓮」嘅身份同送水輝出街，所以呢幾日都顯得心事重重～見到送水輝都會迴避，因為怕自己會忍唔住約佢見面（笑）～

公司入面嘅群姐因為太想見到歐陽震華而偽造公司印咭，打算去呃歐陽震華見面會入場券（網民話想睇歐陽震華同群姐感情戲，好重口）！被揭發之後，群姐上咗大小姐Office自辯，當講到：「想見一個人但又無法擁有嘅心情」，大小姐同群姐都忍唔住攬住一齊痛哭！大小姐同群姐都真係七情上面、流哂眼淚出嚟㗎！

見到群姐整假咭，大小姐有樣學樣，走去印刷公司整假咭嚟呃送水輝！大小姐喺門口講暗號嗰度真係超搞笑～

送水輝喺街上撞到明珠（馬蹄露飾）用假咭呃佢，仲要比送水輝即場揭發！送水輝即刻嬲爆：「之前大把女人想用呢招呃我，所以我先係張咭度整咗防偽標籤保障自己！你已經觸碰咗我嘅底線，已經被列入黑名單，無論如何我都唔會再為你提供服務！」正式同明珠劃清界線！

係呢件事之後，大小姐拎張假咭出嚟俾送水輝吸印仔，但係當送水輝發現大小姐嗰張係假咭，唔單止冇發脾氣，反而甜笑勁Sweet咁同自己講：「算啦，當豪俾你～」呢句真係Sweet到小編睇到嘴角上揚，完全Feel到佢哋嗰種戀愛感覺！

其實送水輝諗起群姐同佢講過：「大小姐同我坐埋同一條船，大家都愛上一個只係當自己係客人、而唔屬於自己嘅男人」相信群姐呢個助攻，對於佢地日後嘅關係都好有幫助呀！

大小姐同送水輝呢個組合已經成為觀眾必睇嘅單元，而佢地喺Instagram亦成日Po出合照～雖然兩人已經名花有主，但係觀眾都勁Enjoy睇佢地做「大小姐」、「送水輝」嘅角色！

好期待嚟緊初戀套餐嘅「棒打鴛鴦篇」、「求婚篇」呀！雖然好想佢地快啲係埋一齊，但佢地真係拍拖又好似會冇咁搞笑～

Text：Girls Editorial

Photo Source：TVB、Instagram