師生戀終於有突破？朱凌凌獻出螢幕初吻被Miss Tong錫錫，網民：吳偉豪絕對係愛回家嘅美色擔當！

《愛回家》除咗大小姐同送水輝條線好睇又搞笑之外，其實好多網民都鐘意睇安仔同凌凌（吳偉豪飾）嘅戲分～不過最近嘅劇情大暴走，突然殺出Miss Tong（楊秀惠）同朱凌凌大玩師生戀！喺噚晚嗰集，吳偉豪仲獻出咗佢嘅螢幕初吻，令到一班網民高呼：「我都想咀凌凌呀！」

愛回家最新嘅一條Love Line就係朱凌凌同Miss Tong嘅師生戀，其實只係朱凌凌暗戀Miss Tong（凌凌又做兵仔了⋯）噚晚一開頭就已經見到凌凌著住白色透視恤衫，又扣少幾粒鈕咁大曬肌肉，真係「妹豬見到都尖叫，哥哥仔見到都心跳」，難怪今集會叫做「香蕉成熟時」啦～

有「香港島吳彥祖」之稱嘅朱凌凌完全係女仔眼中嘅男神，傻強用凌凌名藝約班女仔出嚟聯誼，但凌凌因為放唔低Miss Tong而悶悶不樂，死都唔肯出去～

因為Miss Tong同男朋友分咗手，機會來了凌凌當然要把握！喺Canteen食食吓飯Miss Tong突然行埋嚟主動約佢去「飲杯」食飯，仲拋直球問埋凌凌嘅擇偶條件，令到凌凌以為自己終於喺呢段關係上面邁出一大步～

呢間「飲杯」重點係肯同人錫錫就可以得到招牌五花腩，喺「香港島四子」FF下就出現咗吳偉豪獻出螢幕初吻嘅一幕！不過現實就冇咁好彩啦，因為要得到免費五花腩原來要同男店員錫錫先有！

而Miss Tong亦都唔係真心想約凌凌出嚟，而係為咗幫Abby！

一臉無奈嘅凌凌仲要喺學校門口撞到Miss Tong同男友復合，令佢更加傷心～

為咗忘記Miss Tong，凌凌唯有全心全意投入同Abby嘅交往，只係Abby原來都係一名港女，以為凌凌係前途無可限量嘅律師，一聽到凌凌會轉系就即刻「走夾唔唞」！

最後嗰幕凌凌望住Miss Tong同男友身影，突然話：「由呢刻開始，我唔會再聽你地講嘢，我剩係會信自己！」，相信遲吓劇情可能會講到Miss Tong同凌凌會有機會一齊～

凌凌身邊其實只有Miss Tong支持佢追夢、比唔同嘅意見佢，所以凌凌咁鐘情Miss Tong都好正常呀～

網民睇完今集個個都話想錫凌凌，不過同時亦都為凌凌感到好可惜，因為Miss Tong似乎對凌凌毫無意思，所以網民都話：「凌凌你都係同返安仔一齊啦好冇」～

Text：Girls Editorial
Photo Source：TVB