大小姐幾時正式做宋太呀！大小姐當正自己係Philip仔媽媽，臨尾對望個眼神Sweet到痴線～

大小姐和送水輝每次上演《初戀無限Feel》都會令到觀眾爆笑！噚晚播出嘅《愛回家之開心速遞》再次有佢地嘅初戀套餐，不過今次初戀套餐唔係重點，因為大小姐今集就好似做咗Philip仔媽媽咁，陪佢去面試、搵學校！而大小姐同送水輝嘅感情亦都邁進一大步～

今集講到大小姐同送水輝玩《初戀無限Feel之失業篇》，輝Dee比人炒咗，而大小姐就不斷從旁鼓勵佢～本身仲係好溫柔嘅大小姐，一聽到途人話「接龍集團」係地產霸權、扼殺小市民就即刻變臉！

喺《初戀無限Feel》入面扮窮嘅大小姐話要「慳得一蚊得一蚊」，但係又買咗「隔夜長島麵包」，唔連戲到連輝Dee都忍唔住出聲！

之後突然收到Philip仔來電，原來Philip仔跑步好快，老師仲話只要悉心裁培就仲可以入到港隊添！但呢間學校因為著重培養學生品格，課外活動都只係得一種「道德研習班」，冇田徑隊令到大小姐對學校非常不滿！

校長仲話因為Philip仔跑步跑到心散，要佢放學抄一次校訓先可以走～呢個時候大小姐就即刻反駁校長，幫Philip仔講說話，呢啲呀媽真係好好呀！！

為咗幫Philip仔轉去名校，大小姐仲幫Philip仔搵咗好多課外補習班，但呢啲補習班太貴，連送水輝都要學德文去面試，令到送水輝要去秘撈先可以負擔得起～

當大小姐聽到送水輝要做侍應送外賣，就去咗佢做嘢間餐廳，仲嘈起上嚟！送水輝仲要手指指鬧大小姐：「你做人咪就係咁囉，剩係活喺自己嘅世界入面，連做戲扮窮人你都要買一個成舊水嘅長島麵包！你知唔知窮人食嘅隔夜特價麵包係點㗎？」呢一幕可以睇到送水輝同大小姐之間嘅差距！

鬧交嘅時候，送水輝仲要眼泛淚光，完全演出窮爸爸嘅心酸呀！但係呢段對話亦都可以令兩人更加了解對方嘅處境，彼此了解先係維繫愛情嘅重點呀嘛～

其實當小編睇到呢一幕嘅時候，仲以為佢地會因為身份差距而遠離對方T^T不過都有觀眾話：「送水輝肯對大小姐發脾氣，即係開始唔當大小姐係客啦」

好彩大小姐有參與之後Philip仔入學面試，兩人一個眼神就冰釋前嫌，大小姐仲真係好似做咗Philip仔嘅媽媽咁～

佢地對望嗰個眼神真係Sweet到震！不如大小姐同送水輝快啲結婚啦，成班觀眾都頂唔順佢地咁Sweet啦～～～

一班Fans仲喺林淑敏IG留言：「今集真係好甜好有初戀感覺，大小姐眼神充滿愛呀！感覺佢一定會係個好好的媽咪」、「今集大小姐完全當正自己係飛立媽媽，好錫飛立仔，同阿輝好似兩公婆，大小姐幾時正式做宋太呀？」

仲有啲Fans話要推大小姐再次爭奪最佳女配角添，今年如果大小姐再次入圍，各位Fans記得要投佢一票啦！

Text：Girls Editorial

Photo Source：TVB