15號場次觀眾成為苦主？張敬軒聆聽網民意見改Rundown，尾場再請Boyz令紅館核爆！

張敬軒演唱會無論係Rundown定係嘉賓陣容都成為全城熱話，除咗邀請緋聞對象Kenny（關智斌）之外，前晚特別場仲請咗楊千嬅合唱「可惜我是水瓶座」同埋「再見二丁目」！不過網上就有一班觀眾表示不滿，因為佢哋睇咗15號晚嗰場，唔單止係嘉賓令人失望，甚至比其他場次早完場半個鐘～

網民今次表示極度不滿：「聽你Concert已經難撲飛，大家俾既錢又一樣，點解16號可以多幾首歌 ！係咪我地俾少左個崩你呀？」、「仲要請胡定欣黎做嘉賓，仲要唱乜宮深計，我依家睇勁歌金曲呀？」

點解當晚嘅網民會咁嬲呢？其實係因為15號晚係最早完場嘅一晚，喺11點就已經開燈有廣播叫觀眾離場。同其他場次相比，足足少咗半個鐘，同特別場次相比唱少咗7隻歌！難怪網民會話：「唔會有一日差得過15號！」

而喺嘉賓陣容方面，亦令到網民大失所望！頭場（14號）有天后級嘅容祖兒做嘉賓，仲有修哥＋羅蘭姐，但第2場（15號）就只有胡定欣，仲要唱《深宮計》主題曲⋯⋯

令到網民感到不滿嘅仲有Rundown，頭場（14號）一開始軒仔就著起女裝大唱玩味十足嘅泰文、韓文歌、越南舞曲，不過觀眾唔受落之餘，仲上網發文表示不滿！

一向鐘意同網民互動嘅軒仔聽取網民意見後，喺之後嘅場次大幅減少玩味歌曲～肯臨時改Rundown去遷就樂迷，呢種歌手真係唔話得！

改咗Rundown之後，喺稍後嘅場次，軒仔唱多咗好多Side Track滿足Fans，令到唔少網民都表示：「好欣賞軒仔咁短時間改Rundown遷就歌迷，抵你咁受歡迎」！

尾場當日，軒仔原本冇請嘉賓，但就臨時邀請喺台下欣賞演唱會嘅關智斌、張致恒（Boyz）再度做嘉賓，合唱死性不改，令到全場High爆！

好似軒仔咁聽取Fans意見，願意改Rundown嚟滿足Fans嘅歌手真係好少見～大家真係要好好珍惜呢把好聲音呀！

Text：Girls Editorial

Photo Source：Instagram