宋氏夫婦甜蜜來襲！送水輝、大小姐正式確定戀人關係，送水輝「乜我同你仲要吸印仔咩？」

大小姐、送水輝嘅愛情線永遠都係《愛回家之開心速遞》嘅收視保證，仲有好多網民話要睇《愛回家》只係為咗睇佢地！呢條虐心又甜蜜嘅主線每次都會為觀眾帶來無限驚喜，噚晚嗰集直頭俾網民稱為「睇到好似自己拍拖咁Sweet！」～

每逢星期一／二都超期待睇有大小姐同送水輝嘅《開心速遞》！噚晚嗰集「叫我宋太」單單睇名已經令人覺得好甜蜜啦～不過一開始竟然係大小姐一反常態，當住成大班員工面前大罵送水輝，仲要笑佢髮線高！

送水輝髮線高呢件事已經喺成個威龍秘密網傳開！KC知道咗就大讚龍力蓮終於番返嚟，唔再被啲低級職員吸引～睇到呢度嘅小編仲以為大小姐真係唔再鐘意送水輝啦（哭）～

其實大小姐個心從來都冇放低過送水輝，佢專登等到全部人唔得閒嘅時候就扮成小蓮去唐樓搵輝Dee！最Sweet嘅係送水輝問「今日個劇本呢？」，大小姐就話：「仲劇本⋯劇你個死人頭呀～」證明兩個人已經唔再需要劇本嘅綑綁、送水輝唔再係PTBF，正式一齊咗！

之後送水輝仲問大小姐「想我點叫你」，見到佢地兩個怕怕醜醜個笑容＋一人一句「輝輝」、「小蓮」，聽到真係忍唔住自己笑埋一份呀～

大小姐想幫送水輝抹臉時，送水輝因為怕比大小姐見到條髮線而避開，其實呢個都只係大小姐想做場戲比KC睇先會咁講～

之後仲要真情告白「就算你變咗河童，變咗地中海，我都一樣咁鐘意你㗎～」難怪成班網民係度話「睇到起哂雞皮」、「好正、好Puppy Love」

當鈴聲響起又係「初戀無限Feel」完結嘅時間，但係最令觀眾心動嘅對白一定係呢句「仲帶咩卡呀？我同你仲要吸印仔咩？」（小編已經睇到想歡呼！）

當隔離鄰居問大小姐叫咩名嗰陣，大小姐答「叫我宋太呀～」仲要咁岩俾送水輝見到，唔知幾時大小姐會成為真正嘅宋太呢？

經歷過噚晚關係大躍進之後，兩個人都嘴角含春咁返工～

而且有網民留意到送水輝同大小姐仲用緊情侶手機殼！！

但係最後送貨司機一句「呢種關係冇將來㗎」，又令到觀眾擔心編劇唔通又想拆散佢地！？

Text：Girls Editorial

Photo Source：TVB