小背心短褲勁吸睛！39歲姚嘉妮飾演MK陪月員勁搶鏡，網民大讚：佢係港版Blake Lively～

TVB劇集《BB來了》貼地又充滿共鳴，得到唔少觀眾嘅支持！根據收視報告，《BB來了》比起《天命》高出足足8點收視，除咗劇情有親切感之外，演員都非常重要～Ali李佳芯＋「最接近神嘅男人」黎諾懿完美演繹新手父母嘅辛酸，劇集入面亦都有位演員被網民大讚，呢位就係姚嘉妮啦～

喺《BB來了》入面，姚嘉妮飾演「地獄陪月員」許朗，一出場就著住小背心、短褲大騷美好身材，但原來姚嘉妮今年將會踏入40歲，保養得宜嘅姚嘉妮喺佢身上完全睇唔到歲月嘅洗禮，著起呢啲少女打扮嘅時候毫無違和感！

喺劇集入面，講述佢回憶舊事嘅情節入面，佢仲著埋校服！不過外貌Keep得唔錯嘅姚嘉妮都可以完美Carry校服造型，雖然都有部分網民話「Ali先細過姚嘉妮四年，但相比之下姚嘉妮老好多」，但係姚嘉妮生咗兩個小朋友都仲可以Keep到呢種身材樣貌，已經好勁啦～

而且佢喺《BB來了》入面飾演嘅許朗雖然帶點MK，唔識做陪月又要扮識！但係隨著劇情進展，發現許朗份人好著重情義～見到妹妹Katrina（高海寧 飾）比闊太寸，即刻幫口鬧返人地轉頭！

今次嘅打扮成功令網民留下深刻印象，仲有唔少網民專登Cap圖大讚佢樣靚身材正！除咗而家熱播緊嘅《BB來了》，佢喺《都市閒情》擔任主持嘅打扮都被網民力讚～

姚嘉妮幾乎每集都會著上高踭鞋出鏡，嗰對又長又直嘅美腿絕對媲美一眾後生女！仲有網民話佢根本就係港版Blake Lively添～

下個月就踏入40歲嘅姚嘉妮真係Keep得好好，而且佢有一份獨特嘅成熟感同女人味～其實佢係1998年嘅亞姐季軍，加上自細喺美國國際學校讀書，學歷、氣質、身材、外貌通通有齊！

近幾年為咗專心照顧囡囡Kyra同囝囝Kyros，已經好少出現喺劇集入面～所以今次喺《BB來了》入面見到佢嘅出現都令到一眾網民感到好驚喜！

Text：Girls Editorial

Photo Source：TVB、Instagram