沒有血緣關係的親人！唐寧拍真人騷跟工人姐姐返印尼，內疚落淚：姐姐6年來只同仔仔見得100日！

喺香港地好多家庭都曾經聘請外傭幫手處理家頭細務，唔少小朋友都係由工人姐姐湊大！對於好多人嚟講，工人姐姐唔單止係好幫手，仲係家庭嘅一份子～Viu TV全新真人騷節目《最熟悉的陌生人》就請來幾位嘉賓，跟曾經照顧過佢地嘅姐姐返鄉下，體驗一下姐姐們嘅生活！

一班外傭放低自己嘅家庭，嚟到香港照顧你嘅家庭，每日都喺屋企見到嘅工人姐姐，其實你又有幾了解佢？第一集由唐寧遠赴印尼探佢工人姐姐Muji，Muji幫咗唐寧接近六年，陪伴唐寧渡過人生大大小小嘅事情～

節目一開始就講返Muji對唐寧嘅感受，因為唐寧父母都識講印尼話，所以令到Muji都嚇親！其實唐寧一開始冇諗過請工人，佢媽媽一直都有幫手湊對仔女。但係之後佢媽媽患咗坐骨神經痛，要住院，自己又要打工搵錢，逼於無奈就請工人姐姐～因為唐寧係印尼華僑，所以就請返個印尼姐姐，「話晒係同鄉嘛～」

去緊Muji屋企途中，唐寧已經講咗一句：「愈接近目的地，我嘅心情就愈緊張。我嚟係為咗了解佢更多，但又驚知得愈多，會愈內疚！」

佢一去到Muji屋企，即刻衝上前攬實Muji！

第二個對象就係Muji 6歲仔仔Riski！唐寧眼泛淚光、好內疚地講咗句：「望住佢我嘅心情好複雜，佢地兩母子六年來相處嘅時間，加埋唔夠100日，剩低嗰2000幾日，Muji用嚟照顧我嘅仔女」，覺得自己剝奪咗工人姐姐同仔女相處嘅時光！

一見到Muji間新屋，佢地兩個都忍唔住流眼淚！因為喺鄉下起屋就係Muji呢幾年嚟辛辛苦苦工作賺錢嘅目標，另外亦都因為Muji仲喺香港打緊工，今次返到鄉下先見到呢間新起嘅安樂窩，甚至係最遲入住嘅人⋯⋯令到唐寧覺得好感觸同時亦替佢覺得好開心！

唐寧仲跟住Muji去屋企嘅農地觀察，體驗真正嘅農村生活～

因為Muji姑姐係全村第一個去香港打工嘅女性，所以唐寧亦都去探望佢，令觀眾了解咗唔少工人姐姐嘅童年、婚姻、社會地位等等～其實喺印尼，大部分女性畢業之後，都好難搵工，唯有到香港做工人。而印尼女性普遍都早婚，姑姐話：「嗰陣我16歲，老公19歲，係奉父母之命結婚，唔敢拒絕。喺鄉下，16歲嘅時候係唔識自己搵男朋友。」

一班姐姐離鄉別井去到一個語言不通、無親人嘅地方，為別人嘅家庭而努力。雖然有一班人會話：「佢有錢收、明買明賣」、「可以喺印尼起大屋，好過香港人多多倍」，但係有咩係緊要得過同家人一齊嘅時光？當你每日返屋企，食住姐姐為你煮嘅飯送、瞓住姐姐為你舖好嘅床，不妨為佢送上一份關心，相信只係一句關心說話都可以令佢心頭一暖啊！

Text：Girls Editorial

Photo Source：VIU TV