網民好期待佢套禮服！陳展鵬IG甜蜜放閃：「係佢啦！」，單文柔大方分享浪漫求婚過程～

TVB視帝陳展鵬（煎Pan）噚日喺Big Big Channel向大家宣佈「我要結婚啦！」，對象就係28歲前港姐單文柔（Phoebe）～煎Pan仲一次過公開幾張喺英、法拍攝嘅浪漫婚照，兩人公開婚訊之後，獲得超多Fans嘅祝福！不過亦有好多網民搞笑地表示：「有啲期待佢結婚套衫，始終潮人」、「有冇著魚網衫影婚照」

噚日煎Pan向傳媒公佈：「各位親愛的傳媒朋友、各位好友，多謝大家一直對我的支持和包容。今日，好高興同大家宣布，我要結婚啦！一路以來，我都全情投入工作，直至Phoebe的出現，讓我們感受到幸福和信任。對於感情方面比較傳統的我，是時候用我最大的努力去建立一個美滿的家。多謝大家的關心，希望得到你們的祝福。」

今朝兩人仲係IG瘋狂放閃，當中令到小編爭啲閃到盲嘅就係呢句「係佢啦！」照片入面煎Pan望住未婚妻，配埋呢句真係Sweet到暈！

仲有呢張就配上「也是唯一的」，完全Feel到煎Pan有幾愛Phoebe呀！！

煎Pan同Phoebe舊年3月爆出戀情，二人拍拖年幾就決定結婚，41歲嘅煎Pan之前亦有透露過有想結婚嘅念頭，但最大原因就係因為煎Pan媽媽舊年身體唔舒服、無數負面新聞纏身，喺呢個人生低潮好彩有Phoebe嘅支持陪伴，坦承自己被未婚妻融化！

網民亦大讚Phoebe係好女仔，尤其當佢哋一齊接受訪問時，Phoebe都係笑住望實煎Pan，每答一條問題都望一望男朋友先，小女人嘅感覺令網民都好鐘意～

單文柔2016年參選港姐，雖然喺首圈10強就出局，但係就邂逅擔任港姐星級評判嘅煎Pan！當時煎Pan同胡定欣因為《城寨英雄》成為螢幕情侶，唔少觀眾都以為佢哋真係戲假情真！但煎Pan突然被傳媒影到山頂密會Phoebe，令煎Pan冠上「賤男」稱號，傳出婚訊後亦有部分網民留言話：「你對唔對得住胡定欣！」

一向低調處理感情事嘅佢哋，原來煎Pan之前已經多次向Phoebe求婚！Phoebe接受訪問時就大方分享煎Pan首次求婚過程！當時煎Pan趁佢瞓著時，將一隻心型摺紙戒指套喺佢手上，Phoebe醒後就問佢係唔係求婚？煎Pan答：「咁你應唔應承？」，雖然Phoebe拒絕咗第一次求婚，但其實個心勁冧！

娛樂圈又多一單喜事，大家固然開心！不過煎Pan嘅「亞視味衣著」一向係網民恥笑對象，令到唔少網民都好擔心煎Pan嘅禮服：「好期待佢結婚套西裝」、「希望套西裝唔好咁多銀器」、「魚網西裝褸襯mk銀器」

但煎Pan今朝喺IG Post嘅相都有陣娘娘地嘅感覺⋯⋯

一向鐘意花碌碌嘅煎Pan，亦都喺Pre-Wedding相片入面整返件花花西裝⋯⋯不過未婚妻Phoebe係倫敦藝術大學倫敦時尚學院，修讀布料設計學士課程，相信Phoebe都唔會比煎Pan亂嚟嘅（笑）！

Text：Girls Editorial
Photo Source：Internet，Instagram