為拆散輝蓮CP鋪路？大小姐大罵送水輝：我小你個頭呀，大小姐眼泛淚光演技再獲網民激讚！

呢排《愛回家》有關大小姐同送水輝嘅劇情都係Sweet到漏，呢對正值熱戀期嘅情侶雖然愛得偷偷摸摸，但兩人亦都非常享受呢段關係～但係編劇們又點會俾呢對戀人Keep住甜蜜？就喺前晚播出嘅《愛回家》預告入面，大小姐竟然大罵送水輝，仲嬲爆爆咁話唔想再見到送水輝，令到網民都嚇咗一跳，以為編劇們又要開始虐心情節！

早幾集已經講到大小姐非常重視同鄧總呢單生意，為咗證明俾爸爸睇女人都可以做到，佢就拉埋若水、群姐等人打牌惡補牌技，仲落咗命令唔俾佢地去廁所！當龔燁見到若水急於如廁嘅動靜時，就假裝要喺大小姐面前用水樽小解，令大小姐迫於無奈地放佢地一個Break！（龔燁同若水呢條線都好Sweet呀！！）

因為大小姐太專心打牌，完全忘記咗送水輝喺「覓雪琴室」等緊佢⋯⋯但係為咗傾成同鄧總嘅生意，大小姐叫Mandy打俾送水輝解釋佢嚟唔到赴會！見到送水輝個失望表情，真係連觀眾都心痛埋一份呀～

當送水輝見到人地Mandy同博思都會為對方打打氣，佢見到大小姐咁辛苦，都想為佢送上小驚喜！

喺大小姐同鄧總開視像會議期間，送水輝仲專登拎住甜品，熄埋間房嘅燈，大叫：「Surprise！小蓮～」

點知就搞砸大小姐同鄧總嘅會議，令大小姐嬲到震：「小你個頭呀，我以後唔想再見到你呀，你同我走！」

令到送水輝勁傷心⋯⋯今次仲係佢地兩個之間第一次鬧咁大交！

將誤會解開之後，兩人互訴心聲：「阿輝，事業對我嚟講真係好重要。但係你同事業一樣，一樣咁重要！」兩個人仲勁Sweet咁攬到實一實！

不過，之後呀輝又因為大小姐幫Philip仔擠暗瘡而大鬧：「你死蠢嚟㗎？佢得7歲人仔，你幫佢擠暗瘡？你人頭豬呀？」

令到送水輝坦白同大小姐講咗句：「小蓮，其實每個人心入面都有一樣嘢好重要，唔可以過界㗎！Philip仔個面豬登對我嚟講，就好似你對事業一樣咁重要！其實你對我一樣咁重要」但係轉個頭就即刻攬實Philip仔，令大小姐眼濕濕，網民見到都表示林淑敏超好戲！

經過今次鬧交之後，佢地都好清楚大家嘅底線去到邊，對於情侶相處嚟講未嘗唔係好事啊！不過亦都有網民開始擔心，因為佢地兩個都唔係將對方放喺第一位，會唔會係編劇為咗拆散呢對CP而埋下伏線，專登令到佢地之間嘅關係變質！

Text：Girls Editorial

Photo Source：TVB