新一代好男人代表！陸永為老婆囡囡學影相、考車牌，為了讓老婆過得更輕鬆決心成為更好的自己～
組合農夫成員陸永同老婆Reina結婚7年，Reina為陸永誕下兩個超得意囡囡Hannah同Simsim，成日都喺IG Post佢地搞鬼片段，氹得一班哥哥姐姐都覺得佢地勁Cute！而且陸永同Reina都會喺IG放閃，真係越睇越覺得呢兩公婆好Sweet～
今日正值係Reina生日，一向錫老婆嘅陸永當然都有送禮物俾Reina啦～Reina喺IG Post咗張相，入面就係相機同埋《道路使用者守則》！「從來未收過咁sweet 嘅生日禮物！『老婆，你講得啱，我係應該幫你同兩個女影多啲見得人嘅相，所以我買咗部相機報埋個攝影班！』『日日見你咁頻撲，好攰好眼瞓，想幫輕下你又無能為力，所以鼓起勇氣去學揸車！』好貼心嘅生日禮物，多謝陸生！」
對於一個女生嚟講，男人時刻將妳嘅說話放喺心中、將妳同家庭放喺第一位、為你克服心理障礙去學車，為嘅只係想妳過得輕鬆、舒服啲！相比名牌手袋／鑽石之類嘅奢侈品，女生更想要嘅係呢種啊！睇完都覺得好想搵個陸永咁樣嘅暖男～
之前Reina喺IG講過：「第時你哋大個睇返啲相，你會發覺你啊媽好似乜都冇同你哋做過，因為你有一個唔幫人影張嘅老豆囉..」然後怒Tag陸永！3個月後嘅陸永就報埋攝影班，為老婆囡囡留倩影，呢吓真係好有心思！！絕對抵讚～
陸永嘅細心體貼只係屬於Reina一個
平時電視完美展現搞笑一面嘅陸永，喺老婆囡囡面前，就會有溫柔體貼又細心嘅一面～例如每個女生都最鐘意嘅：男友／老公幫手吹乾頭髮，呢招真係氹得唔少女仔歡心㗎！
一齊早起湊女、食早餐、一齊打機等女放學，成為佢地7週年紀念日嘅活動～好多男人結婚後都會懶得去做呢啲心思嘢，雖然陸太話有冇花都咁開心，但陸永都係好識做送上一大紮玫瑰花俾Reina！
之前Reina呷大女Hannah醋「如果我仲有能力抱得起Hannah嘅話… 影相嗰個點會係我？#駛唔駛咁嗲 #駛唔駛咁冧」，陸永睇完之後就留言：「如果hannah有能力影張靚相，呢張相我抱住嗰個點會係佢？」，Reina睇完應該心都甜哂啦～
工作幾忙都好，屋企人先係最重要！
身為大忙人嘅陸永，一放假就會陪老婆湊女，替Reina分擔一下！又會帶埋一家人一齊去旅行，唔會為咗工作犧牲親子時間！
仲會陪囡囡一齊玩遊戲，唔係一返到屋企就關埋房門玩電腦！唔少網民都話：「呢啲爸爸去邊度搵呀？」
父親節嘅時候，Reina都Post相大讚陸永係好爸爸、好老公：「一個好樂意餵奶掃風換片嘅爸爸、一個喺出面做嘢辛苦返到屋企仲會犧牲休息時間陪兩個女玩嘅爸爸、一個除咗做嘢會將所有時間奉獻畀屋企嘅爸爸、做你女兒係一件好幸福嘅事」，就知道呢個家庭有幾咁幸福！！
Text：Girls Editorial
Photo Source：Instagram
❣️ 立即 Follow 我們的 Instagram girlstyle.mag
✨GirlStyle 女生日常手機應用程式正式登陸 App Store 及 Google Play✨ 👉 立即下載
