孖曾樂彤唱歌被嘲災難！張敬軒提攜後輩不遺餘力，網民大讚：「真心為香港樂壇付出嘅好歌手～」
香港樂壇並唔係大家講嘅一潭死水，仲有好多人不斷喺背後默默努力，做好本地音樂俾香港人！要香港樂壇繼續發光發熱落去，唔少得嘅就係傳承～今年《2018年度叱咤樂壇流行榜頒獎典禮》兩位樂壇新人獎得主洪嘉豪、曾樂彤都齊聲喺台上多謝張敬軒，令大家驚覺原來張敬軒一直都默默提攜後輩上位，仲大讚佢係「真心為香港樂壇付出嘅好歌手」添！
噚晚頒獎禮入面，「叱咤樂壇新力軍」銀獎得主曾樂彤點名多謝同公司嘅張敬軒：「呢一年嚟，佢好多表演都帶咗我出嚟，呢啲對佢嚟講都係唔必要嘅，但我都知道佢為咗幫我，承受咗一啲不必要嘅壓力」
相信曾樂彤講緊嘅就係幾個月前《星光熠熠耀保良》入面，張敬軒同曾樂彤以歌舞劇形式表演，軒仔獨唱《點解我鐘意你》然後同曾樂彤合唱《你回來吧》，呢個表演一出街就負評不斷，網民仲話呢個表演係災難級，更有網民唔明點解咩表演都要帶埋曾樂彤出嚟！
然後叱咤頒發「叱咤樂壇新力軍」金獎，由洪嘉豪奪得！洪嘉豪上台致詞嘅時候亦都感激張敬軒對佢嘅賞識，原來佢哋兩個超有緣份，因為當年帶軒仔嚟香港嘅就係洪嘉豪嘅媽媽，所以洪嘉豪都話張敬軒係「由細睇到我大！」
洪嘉豪除咗多謝環球唱片嘅前輩之外，亦都多謝張敬軒：「不得不多謝由細睇到我大、默默喺背後關注我嘅張敬軒先生，多謝你，如果冇咗你，我冇機會做音樂」
洪嘉豪推出自己作曲嘅出道作《半天空檔》時，張敬軒喺Instagram上面大讚呢位新人！兩個份屬唔同經紀公司，但軒仔亦都跨越呢個隔膜向大家推薦佢嘅音樂，仲搞笑地講：「我鄭重向各位樂迷誠意推薦 #歡迎轉會 」，然後仲要好貼心Tag埋KAHO嘅IG、Hashtag歌名等等！
其實喺張敬軒澳門演唱會彩排時，軒仔就叫洪嘉豪幫手代唱《櫻花樹下》，令佢可以去台下聽吓人聲同樂隊嘅比例！點知洪嘉豪一開聲就一鳴驚人，令到軒仔忍唔住大讚：「那一刻，我就知道他終於會有那麼一天，會在音樂裏開辟一片屬於自己的天地。」
早幾年張敬軒亦都超大方地叫大家投票俾陳柏宇：「近年頒獎禮因為古巨基、陳奕迅、李克勤淡出，所以我們先有機會，我都是受益者，更加想同後輩分享。我自己想攞獎，不過都想有新面孔上台，Jason為人禮貌，已入行十年，值得更多人給予肯定。」
樂壇的確有好多唱得、跳得嘅歌手，但真正想樂壇有良性競爭、令香港人聽到唔同嘅聲音，一心一意為香港樂壇付出嘅，張敬軒絕對表表者！
Text：Girls Editorial
Photo Source：叱咤、Instagram
❣️ 立即 Follow 我們的 Instagram girlstyle.mag
✨GirlStyle 女生日常手機應用程式正式登陸 App Store 及 Google Play✨ 👉 立即下載
